تلنگانہ: نشہ آور اشیاء کے استعمال کے خلاف سخت قدم اٹھانے کی ہدایت۔پولیس کے بیشترمقامات پرچھاپے

حیدرآباد: تلنگانہ میں منشیات کی لعنت کا خاتمہ حکومت کی اولین ترجیح بن چکی ہے۔ وزیر اعلیٰ ریونت ریڈی پہلے ہی اعلان کر چکے ہیں کہ ریاست میں "ڈرگس” کا نام و نشان نہیں رہنے دیں گے۔ اسی پس منظر میں، پولیس کو سخت ہدایات جاری کی گئی ہیں کہ وہ نشہ آور اشیاء کے استعمال اور غیر قانونی ترسیل کے خلاف آہنی قدم اٹھائیں۔

اعلیٰ پولیس حکام نے واضح طور پر حکم دیا ہے کہ منشیات کے مقدمات میں ملوث افراد کے ساتھ سختی سے پیش آیا جائے۔ اس کے تحت ٹاسک فورس اور دیگر پولیس ٹیمیں ریاست بھر میں بڑے پیمانے پر چھاپے مار رہی ہیں۔ بس اسٹینڈز، ریلوے اسٹیشنز، ہوائی اڈوں اور شہروں کے اہم چوراہوں پر گاڑیوں کی تلاشی لی جا رہی ہے، جس کے دوران گانجہ اور دیگر نشہ آور اشیاء کی غیر قانونی منتقلی روکنے میں کامیابی حاصل ہو رہی ہے۔

اسی سلسلے میں، شمس آباد کے علاقے میں ڈرگس کی فروخت کی اطلاع پر ایکسائز پولیس نے سخت جانچ شروع کی۔ چھان بین کے دوران مغربی بنگال سے منشیات لا کر حیدرآباد میں فروخت کرنے والے چار افراد کو حراست میں لے لیا گیا۔ ان کے قبضے سے 70 گرام براون شوگر اور چار موبائل فونز برآمد کیے گئے۔

شمس آباد پولیس نے اس سلسلے میں مقدمہ درج کرتے ہوئے مزید جانچ شروع کر دی ہے۔ پولیس کا کہنا ہے کہ منشیات کے خلاف مہم آئندہ دنوں میں مزید سخت کی جائے گی۔