تلنگانہ: توہم پرستی کی وجہ سے ایک حاملہ خاتون کی موت

حیدرآباد: توہم پرستی کی وجہ سے ایک حاملہ خاتون کی موت کا افسوسناک واقعہ تلنگانہ کے عادل آباد ضلع میں تاخیر سے منظرعام پر آیا۔

تفصیلات کے مطابق عادل آباد ٹاؤن کے بنگارِو گوڑہ علاقہ سے تعلق رکھنے والے پرشانت نے حال ہی میں نیا مکان تعمیر کروانا شروع کیا تھا۔ اس کی اہلیہ پراولیکاچھ ماہ کی حاملہ تھی۔

توہم پرستانہ عقائد کے تحت پرشانت کو یہ یقین تھا کہ گھر کی تعمیر کے دوران حمل برقرار رکھنا نحوست کا سبب بنتا ہے۔اسی وہم کی بنیاد پر اس نے اپنی بیوی کو زبردستی اسقاطِ حمل کی گولیاں کھلا دیں۔

گولیاں کھانے کے بعد خاتون کی طبیعت بگڑ گئی، جس پر گھر والوں نے فوری طور پر اُسے علاج کے لئے حیدرآباد منتقل کیا تاہم، وہ علاج کے دوران اس کی موت ہوگئی۔

خاتون کے گھر والوں کی شکایت پر پولیس نے شوہر پرشانت کے خلاف مقدمہ درج کرکے جانچ شروع کردی۔