تلنگانہ: گوگل میپس پر آرٹی سی بس کے مقام کو دیکھنے کی جلد سہولت کا آغاز

حیدرآباد: کسی نئے علاقہ میں جاتے وقت گوگل میپس کی مدد کتنی کارآمد ہوتی ہے، یہ بتانے کی ضرورت نہیں۔ کسی گاؤں یا شہر کا نام گوگل میپس میں درج کرتے ہی یہ ایپ آپ کو بتا دیتی ہے کہ آپ اس مقام سے کتنی دور ہیں، وہاں پہنچنے میں کتنا وقت لگے گا اور راستہ کون سا ہے۔

اب یہی گوگل میپس اب تلنگانہ کے آر ٹی سی بسوں کی معلومات بھی فراہم کرنے والا ہے۔ اس میں شہر، ضلع اور بین الریاستی بسوں کے اوقات اور راستے بھی براہ راست نظر آئیں گے، جس سے مسافروں کا وقت کافی بچے گا اور عوامی ٹرانسپورٹ نظام مزید مؤثر بنے گا۔

گوگل کمپنی نے تلنگانہ حکومت سے خواہش ظاہر کی کہ آر ٹی سی بسوں کی آمد و رفت کی معلومات گوگل میپس پر فراہم کی جائیں۔ اس سلسلہ میں آئی ٹی محکمہ نے آر ٹی سی منیجنگ ڈائریکٹر کو ایک مکتوب لکھا۔

حال ہی میں گوگل کے ایک نمائندے نے آر ٹی سی ایم ڈی ناگی ریڈی سے ملاقات کر کے اس پر تفصیلی بات چیت کی۔ انہوں نے آر ٹی سی کی لائیو ڈاٹا شیئرنگ کی درخواست کی جس پر انتظامیہ نے مثبت ردعمل دیا۔ ایم ڈی نے آر ٹی سی ایگزیکٹیو ڈائریکٹر منی شیکھر کو ہدایت دی کہ دیوالی تک یہ معلومات گوگل کو فراہم کر دی جائیں۔

ریاست میں آر ٹی سی بسوں میں جی پی ایس سہولت موجود ہے۔ ان بسوں کے لائیو ڈیٹا کو گوگل کے ساتھ شیئر کرنے سے گوگل میپس پر بسوں کی نقل و حرکت ہر وقت دیکھی جا سکے گی۔ ہر 30 سکنڈمیں بس کی موجودہ لوکیشن اپ ڈیٹ ہوگی۔ ابتدا میں یہ سہولت سٹی بسوں کے لئے فراہم کی جائے گی، بعد میں ضلعی اور بین الریاستی سروسز کو بھی شامل کیا جائے گا۔ ایم ڈی ناگی ریڈی نے واضح کیا کہ تقریباً 9,500 بسوں کا لائیو ڈیٹا گوگل کو دیا جائے گا۔

گوگل میپس میں پبلک ٹرانسپورٹ کا ایک آپشن ہوتا ہے۔ اسے منتخب کرکے صرف روانگی اور منزل کا پتہ درج کرنا ہوگا۔ مثال کے طور پر اگر کوئی شاہپور نگر سے سکندرآباد ریلوے اسٹیشن جانا چاہتا ہے، تو ایپ بتائے گی کہ قریبی بس اسٹاپ کتنی دور ہے، بس کتنی دیر میں آئے گی، کون سی بس نمبر لینا ہے وغیرہ۔

اسی طرح اگر حیدرآباد سے جنگاؤں جانا ہو تو بس کن کن اسٹاپس پر رکے گی، کہاں کب پہنچے گی، کتنی دیر میں اگلی بس آئے گی،سب تفصیلات دستیاب ہوں گی۔