تلنگانہ: نوجوان کومارپیٹ کر ہلاک کرنے کے واقعہ کے بعد کشیدگی

حیدرآباد: تلنگانہ کے ضلع نارائن پیٹ کے اوٹکورمنڈل میں ایک نوجوان، جی سنجو کواراضی کے تنازعہ پر بے دردی سے مارپیٹ کر ہلاک کرنے کے واقعہ کے ایک دن بعد، ہفتہ کو اس منڈل کے چنا پورلا گاؤں میں کشیدگی پھیل گئی۔

28سالہ سنجو کو دو ایکڑ زمین کے تنازعہ پر بعض افرادکے ایک گروپ نے مارپیٹ کر ہلاک کر دیا تھا۔

اسے اسپتال لے جایا گیا لیکن وہ زخموں سے جانبر نہ ہوسکا۔پولیس نے جمعہ کی رات اس کی لاش گاؤں منتقل کیا۔

چونکہ ہفتہ کو ان کی آخری رسومات ادا کی جانی تھیں، کسی بھی ناخوشگوار واقعہ کو روکنے کیلئے گاؤں میں پولیس کی بھاری نفری تعینات کی گئی ہے۔

اس سلسلہ میں مقدمہ درج کر کے چار افراد کو گرفتار کر لیا گیا ہے جبکہ تین دیگر فرار ہیں۔