تلنگانہ: گاڑیوں کی تلاشی۔21کلوگانجہ ضبط

حیدرآباد: تلنگانہ کے ورنگل ضلع کے نارکاپیٹ گاؤں کے قریب قومی شاہراہ 365 پر پیر کی شام پولیس نے ایک بڑی کارروائی کرتے ہوئے 21 کلو گانجہ ضبط کر لیا۔

یہ کارروائی اُس وقت کی گئی جب نلابیلی پولیس معمول کے مطابق گاڑیوں کی تلاشی لے رہی تھی۔ پولیس کو ایک گاڑی پر شبہ ہوا، جس کی مکمل تلاشی لینے پر اس میں بڑی مقدار میں گانجہ پایا گیا۔

اس گاڑی میں سوار 2افراد پروین اور ورشا جو مہاراشٹرا سے تعلق رکھتے ہیں اڑیسہ کے بالاپور علاقے سے ممبئی کی طرف گانجہ لے جا رہے تھے۔

محبوب آباد میں پولیس کی سخت نگرانی کی اطلاع ملنے کے بعد ان افراد نے اپنا راستہ بدل کر نرسم پیٹ اور ملگ ضلع کے مالم پلی ہوتے ہوئے ورنگل کی طرف جانے کا منصوبہ بنایا، لیکن نلابیلی کے نارکاپیٹ مقام پر پولیس کی تلاشی میں پکڑے گئے۔

پولیس نے دونوں ملزمین کو حراست میں لے لیا اور ان کے خلاف مقدمہ درج کر لیا ہے۔