امریکہ، روس اور چین کے سفیروں نے من موہن سنگھ کے انتقال پر رنج و غم کا اظہار کیا

نئی دہلی: سابق وزیر اعظم ڈاکٹر منموہن سنگھ کے انتقال پر امریکہ، روس اور چین کے سفیروں نے سوگوار کنبے کے ساتھ گہرے دکھ اور تعزیت کا اظہار کیا ہے اور ان کے تعاون کو یادگار قرار دیا ہے۔

ہندوستان میں امریکی سفیر ایرک گارسیٹی نے ٹویٹر پر اپنی پوسٹ میں لکھا "ہم اپنے پیارے دوست اور سابق وزیر اعظم ڈاکٹر منموہن سنگھ کی بے لوث شراکت کو یاد کرتے ہیں، جنہوں نے امریکہ اور ہندوستان کے تعلقات میں ایک تاریخی باب قائم کیا۔

ہندوستان کی ترقی اور خوشحالی کے لیے ان کی لگن ہماری حوصلہ افزائی جاری رکھے ہوئے ہے۔”

ہندوستان میں روس کے سفیر ڈینس علی پوف نے اپنے پیغام میں کہا "یہ ہندوستان اور روس کے لیے انتہائی دکھ اور غم کا لمحہ ہے۔

ہمارے دو طرفہ تعلقات میں ڈاکٹر منموہن سنگھ کا تعاون بے مثال تھا۔

ایک ماہر معاشیات کے طور پر ہندوستان کی ترقی کے لیے ان کی مہارت اور عزم اور ان کا نرم رویہ بلا شبہ ہمیشہ عزیز رہا۔

ہمارے خیالات اور دعائیں ڈاکٹر منموہن سنگھ کے خاندان اور ہندوستانی عوام کے ساتھ ہیں۔

ہندوستان میں چین کے سفیر ژو فیہ ونگ نے اپنے پیغام میں کہا "سابق ہندوستانی وزیر اعظم ڈاکٹر منموہن سنگھ کے انتقال پر گہرا دکھ ہوا، ایک شاندار لیڈر جن کا ہندوستانی عوام بڑے پیمانے پر احترام کرتے ہیں۔ ان کے اہل خانہ اور چاہنے والوں سے تعزیت۔ "