وائیناڈ میں لینڈ سلائیڈنگ سے مرنے والوں کی تعداد 308 تک پہنچ گئی

وایناڈ: کیرالا کے وایناڈ ضلع میں متعدد مٹی کے تودے گرنے سے مرنے والوں کی تعداد بڑھ کر 308 ہو گئی ہے۔ جمعہ کو یہ اطلاع دیتے ہوئے وزیر صحت وینا جارج نے کہا کہ تقریباً 200 لوگ اب بھی لاپتہ ہیں۔ انہوں نے صحافیوں کو بتایا کہ راحت اور بچاؤ کارروائیاں جاری ہیں اور اب تک 195 لاشیں اور 113 انسانی اعضاء نکالے جا چکے ہیں۔

حکام نے بتایا کہ منگل کو صبح سویرے وایناڈ میں میپاڈی کے قریب پہاڑی علاقوں میں بڑے پیمانے پر مٹی کے تودے گرنے کے بعد 213 سے زیادہ افراد مختلف اسپتالوں میں زیر علاج ہیں۔

اس دوران چھ علاقوں کی تلاش کے لیے 40 سرچ ٹیمیں تشکیل دی گئی ہیں۔ پہلے زون میں اٹامالا اور آرنمالا، دوسرے زون میں منڈاکئی، تیسرے زون میں امالیمٹم، چوتھے زون میں ویللارمالا ولیج روڈ، پانچویں زون میں جی وی ایچ ایس ایس ویللارمالا اور چھٹے زون میں اٹیوارا شامل ہیں۔

ہر ٹیم میں تین مقامی افراد، محکمہ جنگلات کا ایک ملازم اور فوج، بحریہ، کوسٹ گارڈ، نیشنل ڈیزاسٹر ریسپانس فورس اور دیگر کے ارکان شامل ہوں گے۔ یہ ٹیمیں پولیس اور مقامی تیراکوں کی مدد سے آٹھ تھانوں کے علاقوں میں پڑنے والے چلیار ندی کے 40 کلومیٹر کے علاقے کی بھی تلاشی لیں گی۔

پولیس ہیلی کاپٹر کے ذریعے متوازی تلاشی لی جائے گی۔ اس کے علاوہ 10 رکنی تربیت یافتہ ماہر ‘سرچ اینڈ ریسکیو’ (ایس اے آر) کتوں کی ٹیم بھی امدادی کارروائیوں کے لیے تعینات کی گئی ہے۔