شرابی شخص نے بیوی اور بیٹیوں کو زہر دے کر مارڈالا

بنگلورو: کوننناکنٹے پولیس اسٹیشن حدود میں ایک شخص نے اپنی بیوی اور دو بیٹیوں کو کھانے میں زہر دے کر مارڈالا۔ مقتولین کی شناخت وجئے لکشمی (28)، نشا (7) اور دیکشا (5) کی حیثیت سے کی گئی۔ شوہر ناگیندر نے اپنی کلائی کاٹ کر خودکشی کرنے کی کوشش کی تھی مگر اسے بچالیا گیا اور فی الحال دواخانہ میں زیرعلاج ہے۔

 ناگیندر یہ پتا چلنے کے بعد کہ اسے کینسر ہے، مایوسی کا شکار تھا۔ پولیس کے مطابق ناگیندر کو کینسر ہونے کے بعد اس کی بیوی وجئے لکشمی نے گھر چلانے کی ذمہ داری سنبھال لی۔ ان برسوں میں ناگیندر شراب کا عادی ہوگیا۔ پولیس نے کہا کہ ناگیندر اکثر حالت نشے میں گھر آکر بیوی سے جھگڑا کرتا تھا۔

 چہارشنبہ کو بھی اس نے اپنی بیوی وجئے لکشمی سے جھگڑا کیا۔ جھگڑے کے بعد اس نے کھانے میں زہر ملاکر بیوی اور دو بیٹیوں کو دیا جسے کھانے کے بعد ان کی برسرموقع موت ہوگئی۔ یہ واردات اس وقت منظرعام پر آئی جب جمعرات کی صبح وجئے لکشمی کا بھائی ان کے مکان پہنچا۔ لاشوں کو بغرض پوسٹ مارٹم کمس ہاسپٹل منتقل کردیا گیا۔