مکان کی تعمیر کی اجازت نہ دینے پر معمر خاتون پٹرول کی بوتل کے ساتھ گرام پنچایت کے دفتر پہنچ گئی

حیدرآباد: مکان کی تعمیر کی اجازت نہ دینے پر بطور احتجاج ایک معمر خاتون نے پٹرول کی بوتل کے ساتھ گرام پنچایت کے دفتر پہنچ کر احتجاج کیا۔یہ واقعہ تلنگانہ کے نارائن پیٹ ضلع کے مدور منڈل کے ناگی ریڈی پلی گرام پنچایت کے دفتر میں پیش آیا۔

معمر خاتون جس کی شناخت پدمماں کے طور کی گئی نے شکایت کی کہ اس کے بیٹے اسے کھانے پینے کے لئے نہیں پوچھ رہے تھے جس پر اس نے شوہر کے نام پر موجود پٹہ زمین کو ایک دوسرے شخص کو فروخت کردیا۔

گاؤں میں واقع اس پٹہ زمین پر مکان بنانے کی اجازت کے لئے تین ماہ قبل زمین خریدنے والے شخص نے درخواست دی تھی لیکن گرام پنچایت کی جانب سے مکان کی تعمیر کی اجازت نہیں دی جا رہی ہے۔

خاتون نے شکایت کی کہ گاؤں کا پنچایت سکریٹری گزشتہ تین ماہ سے اجازت نہ دے کر پریشان کررہا ہے۔خاتون نے دھمکی دی کہ انصاف نہ کرنے پر وہ خود سوزی کرلے گی۔ اس واقعہ کی اطلاع پر پولیس وہاں پہنچ گئی اور خاتون کے ساتھ انصاف کرنے کا وعدہ کیا۔