ہندوستان کی سیاست میں علاقائی جماعتوں کی اہمیت میں روز بروز اضافہ: کے ٹی آر

حیدرآباد: تلنگانہ کی اصل اپوزیشن بی آرایس پارٹی کے کارگزارصدر کے ٹی راما راؤ نے کہا ہے کہ ہندوستان کی سیاست میں علاقائی جماعتوں کی اہمیت میں روز بروز اضافہ ہوتاجارہا ہے اور یہی پارٹیاں مستقبل میں عوامی مسائل کو مؤثر طریقہ سے حل کرنے کا کردار ادا کریں گی۔

انہوں نے اس بات پر بھی تشویش ظاہر کی کہ ملک میں ایک مضبوط اپوزیشن کی غیر موجودگی جمہوری توازن کو بگاڑ رہی ہے۔

کے ٹی آر نے ایک پوڈکاسٹ کے دوران لوک سبھا حلقوں کی حدبندی کے جاری عمل پر بھی شدید تنقید کی اور انتباہ دیا کہ ہندی کو ملک پر زبردستی تھوپنے کی کوششیں ہندوستان کی لسانی و ثقافتی ہم آہنگی کے لیے خطرہ بن سکتی ہیں۔ انہوں نے کہا کہ تمام زبانوں کو مساوی عزت دی جانی چاہیے۔

پوڈ کاسٹ کے دوران کے ٹی آر نے خود پر لگنے والے الزامات جن میں بدعنوانی، منشیات اور فون ٹیپنگ جیسے معاملات شامل ہیں — پر بھی کھل کر بات کی۔ انہوں نے خود کو شفاف سیاستدان قرار دیتے ہوئے کہا کہ ان الزامات کے بجائے عوامی خدمت اور حکمرانی پر توجہ مرکوز ہونی چاہیے۔

تلنگانہ کی ترقی کی مثال دیتے ہوئے انہوں نے بتایا کہ کس طرح ریاست میں بلا تعطل بجلی، تیز صنعتی ترقی اور عوام دوست پالیسیاں نافذ کی گئیں۔ عوام نے اس طرز حکمرانی کو سراہتے ہوئے دس برس حکومت کی کارکردگی کو مثالی قرار دیا۔