امریکہ میں مسلم زیر انتظام واحد شہر کے میئر کا ٹرمپ کی حمایت کا اعلان

واشنگٹن: امریکہ میں مسلمانوں کے زیر انتظام چلنے والے واحد شہر کے مسلم میئر نے صدارتی انتخابات میں ٹرمپ کی حمایت کا اعلان کردیا۔

غیر ملکی میڈیا کے مطابق امریکی ریاست مشی گن کی وائن کاؤنٹی میں واقع شہر ہیمٹریمک کے میئر عامر غالب نے صدارت کے لیے ری پبلکن کے امیدوار ڈونلڈ ٹرمپ کی حمایت کا اعلان کیا ہے۔رپورٹس کے مطابق ہیمٹریمک امریکہ کا واحد شہرہے جسے مسلم اکثریت چلارہی ہے، شہر کے میئر عامر غالب ہیں اور پوری مقامی انتظامیہ بھی مسلم ارکان پر مشتمل ہے۔

میڈیا رپورٹس میں بتایا گیا ہے کہ امریکہ میں نومبر میں ہونے والے صدارتی الیکشن میں ریاست مشی گن کو اہم انتخابی میدان قرار دیا جارہا ہے اور ایسے میں مسلم میئر نے ٹرمپ کی کھل کر حمایت کا اعلان کیا ہے۔

سوشل میڈیا پر جاری بیان میں میئر ہیمٹریمک عامر غالب نے ٹرمپ کو ایک بہتر انتخاب اور اصول پسند شخصیت قرار دیا جب کہ ساتھ ہی انہوں نے کہا کہ باوجود اس کے ان کے ٹرمپ سے کچھ معاملات پر اختلافات ہیں لیکن وہ پھر بھی ان کی حمایت کرتے ہیں۔

میئر عامر غالب نے کہا کہ ہوسکتا ہے میں اور ٹرمپ ہر چیز پر متفق نہ ہوں مگر مجھے پتہ ہے وہ ایک اصول پسند انسان ہیں، حالانکہ سب اچھا دکھائی دے رہا ہے، اب وہ انتخابات جیت کر امریکہ کے 47 ویں صدر بنیں یا نہ بن سکیں لیکن مجھے یقین ہے کہ وہ اس اہم موقع پر امریکی صدارت کے لیے مناسب انتخاب ہیں۔

انہوں نے مزید کہا کہ مجھے اس بات کی کوئی پرواہ نہیں کہ نتیجہ کیا نکلتا ہے مگر میں اس کا سامنا کرنے کے لیے بھی پوری طرح تیار ہوں، مجھے اپنے فیصلے پر کوئی ملامت نہیں ہوگی۔میئر عامر غالب کا کہنا تھا کہ چلیں ایک کاررواں کو اپنے سفر کا آغاز کرنے دیں، یہ ایک نقطہ آغاز ہے۔

میڈیا رپورٹس کے مطابق سابق صدر نے میئر عامر غالب کے بیان پر پسندیدگی کا اظہار کیا اور اسے اپنے اکاؤنٹ سے ری پوسٹ بھی کیا۔ریاست مشی گن کے شہر ہیمٹریمک کی آبادی 28 ہزار شہریوں پر مشتمل ہے اور یہ شہر اس وقت خبروں کی زینت بنا جب 2021 میں یہاں میئر سمیت تمام مسلمان سٹی کونسل کے ارکان منتخب ہوئے۔