کرکٹرس سے مناسب تعاون نہ ملنے سے احتجاجی ریسلرس مایوس

نئی دہلی: ہندوستان کے تجربہ کار پہلوان ونیش پھوگاٹ، بجرنگ پونیا اور ساکشی ملک نے دہلی کے جنتر منتر پر ریسلنگ فیڈریشن آف انڈیا (ڈبلیو ایف آئی) اور اس کے صدر برج بھوشن شرن سنگھ کے خلاف غیر معینہ مدت کی ہڑتال کر رکھی ہے۔

پہلوانوں نے برج بھوشن پر جنسی استحصال سمیت کئی سنگین الزامات لگائے ہیں۔ پہلوان پچھلے چھ دنوں سے احتجاج کررہے ہیں اور سڑک پر سو رہے ہیں۔ پہلوانوں نے برج بھوشن کے خلاف ایف آئی آر درج کرنے کا بھی مطالبہ کیا ہے۔

 ہندوستانی اولمپک اسوسی ایشن کے صدر پی ٹی اوشا، ہندوستان کے پہلے اولمپک گولڈ میڈلسٹ ابھینو بندرا سمیت کئی کھلاڑیوں نے اس معاملے پر بیانات دیئے ہیں۔ تاہم ونیش نے کرکٹرز سمیت کئی اسٹار کھلاڑیوں کی خاموشی پر سوال اٹھایا ہے۔ مایوس ونیش نے کہاکہ جنہوں نے اس معاملے پر ایک لفظ بھی نہیں کہا ان کا دل نہیں ہوتا۔

 ایک میڈیا سے بات کرتے ہوئے ونیش نے ملک کے سرکردہ کرکٹرز پر سخت حملہ کرتے ہوئے پوچھا کہ جب وہ اکثر سوشل میڈیا پر اولمپکس یا کامن ویلتھ جیسے کھیلوں میں کھلاڑیوں کی کامیابیوں پر تبصرہ کرتے ہیں تو وہ اس معاملہ پر کیوں خاموش ہیں۔

انہوں نے کہاکہ پورا ملک کرکٹ کی پوجا کرتاہے، لیکن ایک بھی کرکٹر نے کچھ نہیں کہا۔ ہم یہ نہیں کہہ رہے کہ آپ ہمارے حق میں بات کریں لیکن کم ازکم ایک غیر جانبدارانہ پیغام دیں اور کہیں کہ کسی بھی فریق کیلئے انصاف ہونا چاہیے۔

یہ وہ جگہ ہے جہاں مجھے تکلیف ہوتی ہے۔ چاہے وہ کرکٹرز ہوں، بیاڈمنٹن کھلاڑی ہوں، اتھلیٹکس ہوں یا باکسنگ۔ ونیش نے کہاکہ ایسا نہیں ہے کہ ہمارے ملک میں کوئی بڑے کھلاڑی نہیں ہیں۔ کرکٹرز ہیں انہوں نے امریکہ میں بلیک لائیوز میٹر موومنٹ کے دوران اپنی حمایت ظاہر کی۔ کیا ہم اس قابل بھی نہیں ہیں؟ ونیش حیران ہیں کہ کیا یہ کرکٹرز اور دیگر کھلاڑیوں کے اسپانسرشپ معاہدے ہیں جو انہیں خاموش رہنے پر مجبور کررہے ہیں یا یہ وہ ’نظام‘ ہے جس سے وہ ڈرتے ہیں۔

 ونیش نے مزید کہاکہ ہم نہیں جانتے کہ وہ کس سے ڈرتے ہیں۔ میں سمجھتا ہوں کہ وہ فکر مند ہوسکتے ہیں کہ بیان دینے سے ان کی کفالت اور برانڈ کی توثیق کے معاہدوں پر اثر پڑے گا۔ شاید اسی لیے وہ اپنے آپ کو ان کھلاڑیوں کے ساتھ جوڑنے سے ڈرتے ہیں جو احتجاج کر رہے ہیں، لیکن اس سے مجھے تکلیف ہوتی ہے۔

 جب ہم کچھ جیتتے ہیں تو آپ ہمیں مبارکباد دینے کیلئے آگے آتے ہیں۔ جب ایسا ہوتاہے تو کرکٹرز بھی ٹویٹ کرتے ہیں۔ اب کیا ہوا؟ کیا آپ سسٹم سے ڈرتے ہیں؟ یا شاید وہاں بھی کچھ گڑبڑ ہورہی ہے۔ کیا ہم مان لیں کہ دال میں بھی کالا ہے؟ ونیش نے کہاکہ لوگ کہتے ہیں کہ پہلوان کا بھیجہ گھٹنوں میں ہوتاہے، لیکن میں کہوں گا کہ ہمارا دل، دماغ سب کچھ صحیح جگہ پر ہے۔

دوسرے کھلاڑیوں کو یہ دیکھنے کی ضرورت ہے کہ ان کا دماغ کہاں ہے۔ ان کا دل بالکل نہیں ہے۔ ونیش نے کرکٹرز اور دیگر کھلاڑیوں سے بھی کہاکہ وہ ملک کیلئے تمغہ جیتنے پر اس کی حمایت نہ کریں اگر وہ اس وقت ان کا ساتھ نہیں دے سکتے تو ان کی حمایت بھی نہ کریں۔

 ونیش نے مزید کہاکہ اگر ہم کل کوئی تمغہ جیتتے ہیں اور اس کیلئے بہت محنت کرتے ہیں تو شاید وہ ہمیں مبارکباد دینے نہ آئے۔ تاہم ونیش کے اس بیان کے بعد کپل دیو، ویریندر سہواگ، ہربھجن سنگھ اور عرفان پٹھان کے بیانات سامنے آئے ہیں۔

 ہندوستان کو 1983 کا ورلڈ کپ جتوانے والے کپتان کپل دیو نے انسٹاگرام پر پہلوانوں کی تصویر پوسٹ کرتے ہوئے لکھاکہ کیا انہیں کبھی انصاف ملے گا؟ سابق کرکٹر ویریندر سہواگ نے لکھاکہ یہ بڑے دکھ کی بات ہے کہ ہمارے چمپئن جنہوں نے ملک کا نام روشن کیا، پرچم لہرایا، ہم سب کیلئے اتنی خوشیاں لائے، انہیں سڑک پر آنا پڑا۔

 آج یہ انتہائی حساس معاملہ ہے اور اس کی غیر جانبداری سے تحقیقات ہونی چاہیے۔ امید ہے کھلاڑیوں کو انصاف ملے گا۔ عرفان پٹھان نے کہاکہ ان پہلوانوں کے ساتھ جلد سے جلد انصاف ہونا چاہئے۔