قصہ کرسی کا، بارات نکاح کے بغیر واپس چلی گئی
دلہن کے والد کا کہنا ہے کہ بارات پہنچنے کے بعد ہر شخص تقریب سے لطف اندوز ہورہا تھا لیکن اسی دوران دلہے کی دادی اور ایک مہمان کے درمیان کرسی پر جھگڑا شروع ہوگیا۔
اورنگ آباد: شادی کی تقریب میں ایک کرسی پر دلہے کی دادی اور ایک مہمان کے درمیان جھگڑا اتنا بڑھا کہ دلہے والوں نے نکاح منسوخ کرنے کا اعلان کردیا اور بارات لے کر واپس چلے گئے۔ یہ واقعہ اورنگ آباد میں پیش آیا۔
دلہن کے والد مبین نے بتایا کہ ان کی بیٹی کی بارات نئی دہلی سے اورنگ آباد پہنچی تھی جہاں ان کے پورے خاندان نے دولہے اور اس کے گھر والوں کا استقبال کیا۔
بارات پہنچنے کے چند گھنٹوں بعد ہی دولہے نے اس شادی کو ختم کرنے کا فیصلہ کرلیا۔ دلہن کے والد کا کہنا ہے کہ بارات پہنچنے کے بعد ہر شخص تقریب سے لطف اندوز ہورہا تھا لیکن اسی دوران دلہے کی دادی اور ایک مہمان کے درمیان کرسی پر جھگڑا شروع ہوگیا، دولہے کی دادی نے اس جھگڑے کو اپنی بے عزتی سمجھا اور دولہے سے شکایت کردی جس کے بعد جھگڑا مزید شدت اختیار کرگیا۔
رپورٹ کے مطابق جھگڑے کے دوران دولہے والوں نے دلہن والوں کو دھمکیاں بھی دیں ، جھگڑا مزید بڑھنے پر دلہن کے گھر والوں نے دولہے کے خاندان کو ایک کمرے میں بند کردیا اور شادی پر خرچ کی گئی رقم کا مطالبہ کیا۔
تقریب میں شامل ایک مہمان نے بتایا کہ دولہے کے گھر والوں کی جانب سے کچھ رقم کی ادائیگی کے بعد دلہن کے گھر والوں نے انھیں بارات واپس لے جانے کی اجازت دی۔
