احمدآباد میں ہونے والے میاچس کے دوران دہشت گردانہ حملوں کا خطرہ

احمدآباد: آئی سی سی ورلڈ کپ 2023 کے دوران احمدآباد میں ہونے والے میاچس کے دوران دہشت گردی کا خطرہ منڈلانے لگا۔ رپورٹس میں دعویٰ کیاجا رہاہے کہ دہشت گردوں نے احمدآباد میں ہونے والے میچوں کو نشانہ بنانے کی دھمکیاں دی ہیں جس سے کھلاڑیوں اور تماشائیوں کے تحفظ کے بارے میں خدشات پیدا ہوگئے ہیں۔

 ورلڈکپ کا آغاز آج سے احمدآباد میں ہوا جہاں دفاعی چمپئن انگلینڈ اور نیوزی لینڈ کے درمیان افتتاحی مقابلہ کھیلا گیا۔ اسٹیڈیم اور اس کے آس پاس کے حفاظتی اقدامات کو بڑھاتے ہوئے 3 ہزار سے زائد پولیس عہدیدار تعینات کیے گئے جو شائقین کرکٹ سمیت ٹیموں کی سیکوریٹی پر معمور ہوں گے۔

اسی طرح میاچس کے دوران اسٹیڈیم جانے والی سڑک کو مکمل طورپر بند رکھنے کا فیصلہ کیاگیا ہے۔ رپورٹس میں کہاگیا ہے کہ احمدآباد اسٹیڈیم میں ہونے والے میچوں کے دوران سخت سیکوریٹی پروٹوکول لاگو کیا جائے گا۔

تماشائیوں کو اسٹیڈیم کے اندر صرف موبائل فون لے جانے کی اجازت ہوگی جبکہ دیگر تمام اشیاء کی سختی سے ممانعت ہوگی۔ واضح رہے کہ احمدآباد میں ورلڈکپ کے افتتاحی میاچ اور ہند۔ پاک میچ سمیت کل 5 میاچس کھیلے جائیں گے۔ روایتی حریف پاکستان اور ہندوستان کے درمیان اہم مقابلہ 14 اکتوبر کو کھیلا جائے گا۔