حیدرآباد میں 10 دن تک ٹریفک تحدیدات نافذ
خیریت آباد سے راجیو گاندھی مجسمہ اور منٹ کمپاؤنڈ کی طرف گاڑیوں کا داخلہ ممنوع ہوگا، جبکہ اولڈ سیف آباد پولیس اسٹیشن سے خیریت آباد گنیش کی طرف جانے والی سڑک بھی بند رہے گی۔
حیدرآباد: شہر میں گنیش چتورتھی کے موقع پر ٹریفک پابندیاں نافذ کر دی گئی ہیں، جو آج سے شروع ہو کر 17 ستمبر کی آدھی رات تک جاری رہیں گی۔ خیریت آباد میں بڑے گنیش کی تنصیب اور شہر کے مختلف مقامات پر ونائکا منڈپم کی وجہ سے ٹریفک کی آمد ورفت کو متاثر ہونے سے بچانے کیلئے پولیس نے یہ اقدامات کیے ہیں۔
خیریت آباد گنیش کے اطراف اور اہم سڑکوں جیسے ٹینک بنڈ، نیکلس روڈ، اور منٹ کمپاؤنڈ میں عام ٹریفک کو محدود کردیا گیا ہے۔ خیریت آباد سے راجیو گاندھی مجسمہ اور منٹ کمپاؤنڈ کی طرف گاڑیوں کا داخلہ ممنوع ہوگا، جبکہ اولڈ سیف آباد پولیس اسٹیشن سے خیریت آباد گنیش کی طرف جانے والی سڑک بھی بند رہے گی۔
نیکلس روٹری اور خیریت آباد فلائی اوور سمیت کئی مقامات پر ٹریفک کو دیگر راستوں کی طرف موڑ دیا گیا ہے، جبکہ گنیش دیکھنے آنے والوں کیلئے مخصوص پارکنگ مقامات جیسے امبیڈکر اسکوائر پارکنگ لاٹ، این ٹی آر گارڈن پارکنگ، اور سرسوتی ودیا مندر ہائی اسکول احاطہ میں پارکنگ کی سہولت فراہم کی گئی ہے۔
شہر میں ٹریفک پولیس نے عوام سے اپیل کی ہے کہ وہ ان پابندیوں کے پیش نظر متبادل راستوں کا استعمال کریں تاکہ کسی قسم کی تکلیف سے بچا جا سکے۔
