سلطان پور میں ٹریلر نے بائک سواروں کو روندا

سلطان پور: اترپردیش کے ضلع سلطان پورمیں اجودھیا۔پریاگ راج قومی شاہراہ پردیہات کوتووالی علاقے کے پکڑی گاؤں کے نزدیک منگل کو تیز رفتار ٹریلر نے موٹر سائیکل سوار تین نوجوانوں کو کچل دیا۔

اس حادثے میں ایک نوجوان کی موقع پر ہی موت ہو گئی، جبکہ دو دیگر شدید طور پر زخمی ہو گئے۔ پولیس ذرائع کے مطابق حادثے میں پرتاپ گڑھ ضلع کے شیوا پور، کوہڑور کے رہنے والے پرشانت کمار (20) کی موت ہو گئی، جبکہ ان کے ساتھی راج کمل (18) اور ششانک (18) شدید زخمی ہو گئے۔ تینوں نوجوان پرتاپ گڑھ ضلع کے رہائشی بتائے جا رہے ہیں۔

حادثے کے بعد مقامی لوگوں نے فوری طور پر ایمبولینس کو اطلاع دی، تاہم تقریباً آدھے گھنٹے تک ایمبولینس موقع پر نہیں پہنچی۔ اس لاپروائی سے ناراض دیہی باشندوں نے زخمی نوجوانوں کو مال بردار ای رکشا کے ذریعے ضلع اسپتال پہنچایا، جہاں سے ان کی نازک حالت کو دیکھتے ہوئے ٹراما سینٹر لکھنؤ ریفر کر دیا گیا۔ اطلاع ملنے پر پولیس موقع پر پہنچی اور تفتیش شروع کر دی۔ پولیس حادثے کے بعد فرار ہونے والے ٹریلر ڈرائیور کی تلاش میں مصروف ہے۔