یو جی سی نیٹ دسمبر 2026 رجسٹریشن کی آخری تاریخ میں توسیع، 31 اکتوبر تک درخواست دینے کا موقع

نئی دہلی: نیشنل ٹیسٹنگ ایجنسی (NTA) نے یو جی سی نیٹ دسمبر 2026 امتحان کے لیے آن لائن رجسٹریشن کی آخری تاریخ میں توسیع کرتے ہوئے اسے 31 اکتوبر مقرر کیا ہے۔ اس فیصلے سے ان امیدواروں کو راحت ملی ہے جو اب تک اپنی درخواستیں مکمل نہیں کر سکے تھے۔

این ٹی اے کی جانب سے 27 اکتوبر کو جاری کردہ عوامی نوٹس کے مطابق، امیدوار 31 اکتوبر 2026 کی رات 11:50 بجے تک بغیر کسی لیٹ فیس کے آن لائن درخواست جمع کرا سکتے ہیں اور امتحانی فیس بھی ادا کر سکتے ہیں۔ اس توسیع کا مقصد ان امیدواروں کو اضافی وقت فراہم کرنا ہے جو سابقہ آخری تاریخ تک رجسٹریشن کا عمل مکمل نہیں کر پائے تھے۔

این ٹی اے نے امیدواروں کو مشورہ دیا ہے کہ وہ آخری وقت کا انتظار نہ کریں، کیونکہ ویب سائٹ پر زیادہ ٹریفک کی وجہ سے تکنیکی مسائل پیش آ سکتے ہیں۔ امیدواروں سے اپیل کی گئی ہے کہ وہ جلد از جلد رجسٹریشن اور فیس کی ادائیگی کا عمل مکمل کرلیں۔

5 .5   لاکھ سے زائد امیدواروں کی رجسٹریشن این ٹی اے کے تازہ ترین اعداد و شمار کے مطابق، 25 اکتوبر تک یو جی سی نیٹ دسمبر 2026 امتحان کے لیے مجموعی طور پر 5,50,048 امیدواروں نے رجسٹریشن کرائی تھی۔ ان میں سے صرف 3,73,419 امیدواروں نے اپنی درخواستیں مکمل کرتے ہوئے امتحانی فیس ادا کی تھی۔

اعداد و شمار سے یہ بھی معلوم ہوا کہ 1,36,993 امیدواروں نے ابھی تک اپنی تصاویر اور دستخط اپ لوڈ کرنے کے ساتھ فیس کی ادائیگی کا عمل مکمل نہیں کیا تھا۔ اس کے علاوہ 31,580 امیدواروں نے تصاویر اور دستخط اپ لوڈ کر دیے تھے، لیکن امتحانی فیس ادا نہیں کی تھی۔

ایجنسی نے ایسے تمام امیدواروں سے اپیل کی ہے جن کی درخواستیں ابھی نامکمل ہیں کہ وہ باقی مراحل جلد مکمل کریں اور اپنی درخواست کامیابی سے جمع ہونے کی تصدیق کے لیے ایپلی کیشن کنفرمیشن پیج ڈاؤن لوڈ کرلیں۔

جے آر ایف، اسسٹنٹ پروفیسر کی اہلیت اور پی ایچ ڈی میں داخلوں کے لیے امتحان

یو جی سی نیٹ امتحان کے ذریعے جونیئر ریسرچ فیلوشپ (JRF)، ہندوستان کی یونیورسٹیوں اور کالجوں میں اسسٹنٹ پروفیسر کی تقرری کے لیے اہلیت اور متعلقہ شرائط کے مطابق پی ایچ ڈی پروگراموں میں داخلے کے لیے امیدواروں کی اہلیت کا تعین کیا جاتا ہے۔

امیدوار اہلیت کے معیار، امتحان کے طریقہ کار اور دیگر معلومات کے لیے این ٹی اے کی سرکاری ویب سائٹس ملاحظہ کر سکتے ہیں۔

[nta.ac.in](https://nta.ac.in) or (https://ugcnet.nta.nic.in).

31

اکتوبر درخواست جمع کرنے اور امتحانی فیس ادا کرنے کی آخری تاریخ ہے۔ این ٹی اے نے امیدواروں کو ہدایت دی ہے کہ وہ تمام ضروری کارروائی وقت پر مکمل کرلیں تاکہ امتحان میں شرکت کا موقع ضائع نہ ہو۔