تلنگانہ میں غیرموسمی بارش۔فصلوں کو نقصان

حیدرآباد: تلنگانہ بھر کے کئی اضلاع میں کسانوں کو غیرموسمی بارش نے پریشان کردیا۔ بارش کے سبب آم اور دھان جیسی تیار فصلوں کو شدید نقصان پہنچا۔

گرج و چمک اور تیز آندھی کے ساتھ ہوئی بارش سے کئی دیہاتوں میں بجلی کی سپلائی متاثرہوئی۔کسانوں کا کہنا ہے کہ محنت سے اگائی گئی فصلیں کٹائی کے مرحلہ میں تھیں، مگر غیر موسمی بارش اور تیز ہواؤں نے ان کی ساری محنت پر پانی پھیر دیا۔

آم کے باغات میں تیار پھل زمین پر گر کر خراب ہوگئے، جبکہ دھان کی فصل پانی میں بہہ گئی یا کیچڑ میں دب کر برباد ہوگئی۔دیہی علاقوں میں بجلی کی بحالی میں تاخیر سے کسانوں کو مزید دشواریوں کا سامنا ہے۔

کسانوں نے حکومت سے اپیل کی ہے کہ وہ متاثرہ فصلوں کا جائزہ لے کر معاوضہ فراہم کرے تاکہ ان کے نقصان کی کچھ تلافی ہو سکے۔

زرعی ماہرین نے بھی خبردار کیا ہے کہ اگر اسی طرح موسمیاتی تبدیلیاں جاری رہیں تو زرعی پیداوار پر منفی اثرات مزید بڑھ سکتے ہیں۔