تلگو زبان کو محفوظ رکھنے اورہر گھر سے تحریک شروع کرنے کی فوری ضرورت:کشن ریڈی

حیدرآباد: مرکزی وزیر کوئلہ و کانکنی جی کشن ریڈی نے تلگو زبان کو محفوظ رکھنے کی فوری ضرورت پر زور دیا اور گھر سے ایک تحریک شروع کرنے کی اپیل کی۔حیدرآباد انٹرنیشنل کنونشن سنٹر (ایچ آئی سی سی) میں منعقدہ ورلڈ تلگو فیڈریشن کی 12ویں دو سالہ کانگریس میں بحیثیت مہمان خصوصی خطاب کرتے ہوئے انہوں نے تلگو زبان کو مادری زبان کے طور پر پروان چڑھانے کی اہمیت پر زور دیا تاکہ اس کے ثقافتی اور لسانی ورثہ کو محفوظ رکھا جا سکے۔

انہوں نے کہا، ”میں ورلڈ تلگو فیڈریشن کی 12ویں دو سالہ کانگریس میں شرکت کرتے ہوئے خوشی محسوس کر رہا ہوں۔ محترمہ اندرا دت اور ان کی ٹیم کا شکریہ ادا کرتا ہوں کہ انہوں نے اس تین روزہ ایونٹ کو ہمارے شہر میں منعقد کیا۔ فیڈریشن 32 سال سے تلگو برادری کی خدمت کر رہی ہے، زبان، روایات اور فنون کو فروغ دے رہی ہے اور دنیا بھر میں فنکاروں کی حمایت کر رہی ہے۔

”کشن ریڈی نے کہا کہ دنیا بھر سے تلگو بولنے والے لوگوں کو ایک پلیٹ فارم پر متحد دیکھ کر فخر محسوس ہوتا ہے جو تلگو زبان، ادب، اور روایات کا جشن منانے کے لیے اکٹھے ہوئے ہیں۔ انہوں نے تلگو کو ہندوستان کی قدیم اور دلکش زبانوں میں سے ایک قرار دیتے ہوئے کہا کہ مرکزی حکومت کی جانب سے اسے کلاسیکل زبان کے طور پر تسلیم کرنا اس کی ثقافتی اہمیت کو اجاگر کرتا ہے۔

وزیر موصوف نے تلگو زبان کے کم ہوتے ہوئے استعمال پر تشویش کا اظہار کیا، جہاں لوگ تلگو الفاظ لکھنے کے لیے بھی انگریزی کو ترجیح دے رہے ہیں۔ انہوں نے کہا، ”یہ دیکھ کر افسوس ہوتا ہے کہ تلگو کو نظر انداز کیا جا رہا ہے۔ آج گھروں میں صرف 30 فیصد گفتگو تلگو میں ہوتی ہے جبکہ باقی انگریزی میں۔ پہلے سب کچھ تلگو میں کہا جاتا تھا۔ آئیے یہ عہد کریں کہ تلگو میں گفتگو کریں گے، اپنے گھر سے شروع کریں گے۔”