امریکہ کی 249ویں یومِ آزادی کی تقریب، امریکی قونصل جنرل، چارج ڈی افیئرز اور وزیر اعلیٰ ریونت ریڈی کی شرکت

حیدرآباد – امریکی قونصل جنرل جینیفر لارسن نے جمعہ، 11 جولائی کو حیدرآباد میں امریکہ کی 249ویں یومِ آزادی کی شاندار تقریب کا انعقاد کیا۔ اس موقع پر نئی دہلی میں امریکی سفارت خانے کے چارج ڈی افیئرز، جارجن اینڈریوز (Jorgan Andrews) اور تلنگانہ کے وزیر اعلیٰ ریونت ریڈی مہمانِ خصوصی کے طور پر شریک ہوئے۔

اس سال تقریب کا تھیم "ایک ساتھ، زیادہ مضبوط” (Together, Stronger) تھا، جو امریکہ اور بھارت کے درمیان اتحاد اور باہمی تعاون کو اجاگر کرتا ہے۔

تقریب کا آغاز دونوں ممالک کے قومی ترانوں کی دھن سے ہوا، جس کے بعد امریکی میرین کور (U.S. Marine Corps) کی جانب سے ایک باوقار Presentation of Colors تقریب پیش کی گئی۔

قونصل جنرل جینیفر لارسن، جو کہ حیدرآباد میں اپنی تیسری اور آخری یومِ آزادی منا رہی تھیں، نے الوداعی خطاب میں کہا:
"حیدرآباد، امریکہ-بھارت تعلقات کی مضبوطی کی ایک بہترین مثال ہے، جہاں اختراع اور تعاون کے ذریعے ہم عالمی چیلنجز کا مقابلہ کر رہے ہیں اور دونوں ممالک کے لیے ترقی کی راہیں ہموار کر رہے ہیں۔ میرے لیے یہ باعثِ اعزاز رہا کہ میں نے یہاں خدمت انجام دی اور اس غیر معمولی شراکت داری کو پروان چڑھتے دیکھا۔”

چارج ڈی افیئرز جارجن اینڈریوز نے کہا:
"امریکہ-بھارت تعلقات جمہوری اقدار، باہمی احترام اور عالمی ترقی کے عزم پر مبنی ہیں۔ اس سال کا تھیم ہمارے باہمی تعلقات کی مضبوطی اور روشن مستقبل کے عزم کی عکاسی کرتا ہے۔ ہم نہ صرف ایک اہم سنگِ میل کا جشن منا رہے ہیں بلکہ ان نمایاں کامیابیوں کو بھی سراہ رہے ہیں جو ہر گزرتے سال کے ساتھ مضبوط ہوتی جا رہی ہیں۔”

تقریب کے مہمانِ خصوصی، وزیر اعلیٰ ریونت ریڈی نے اپنے خطاب میں امریکہ اور تلنگانہ کے درمیان گہرے اور دیرینہ روابط پر روشنی ڈالی۔ انہوں نے کہا:
"تلنگانہ اور امریکہ کی روح ایک جیسی ہے — پائیدار، جدت پسند اور مستقبل کی طرف دیکھنے والی۔ یومِ آزادی کے اس موقع پر ہم اس خصوصی دوستی کو مزید مضبوط کرنے کے عزم کا اعادہ کرتے ہیں، اور جمہوریت، اختراع اور عوامی روابط کے ذریعے مشترکہ خوشحالی کی جانب بڑھنے کا وعدہ کرتے ہیں۔”

یہ شاندار تقریب اس بات کا اعادہ تھی کہ امریکہ اور بھارت کی شراکت داری آزادی، جمہوری اقدار اور باہمی ترقی کے عزم پر مبنی ہے — ایک ایسا عزم جو دونوں اقوام کو ایک محفوظ اور خوشحال مستقبل کی جانب مل کر لے جا رہا ہے۔