پانی کی قلت، کسانوں کا احتجاج

حیدرآباد: تلنگانہ کے ضلع کھمم کے کونیزرلا منڈل میں فصلوں کے لئے پانی کی قلت کے خلاف کسانوں نے شدید احتجاج کرتے ہوئے سڑکوں پر دھرنا دیا۔

گوباگورتی کے مقام پر کسانوں نے ایسکور۔پلی پاڈو شاہراہ پر راستہ روکو احتجاج کیا، جس کی وجہ سے ٹریفک کا نظام درہم برہم ہو گیا اور سڑک کے دونوں جانب گاڑیوں کی لمبی قطاریں لگ گئیں۔

کسانوں کا کہنا ہے کہ ناگرجناساگر سے پانی کی عدم فراہمی کی وجہ سے ان کی مکئی کی فصلیں سوکھ رہی ہیں۔

احتجاجی کسانوں نے الزام لگایا کہ انہوں نے اس مسئلہ کے حل کے لئے مقامی قائدین اور حکام سے کئی بارمعاملہ کو رجوع کیا لیکن کسی نے ان کی فریاد نہیں سنی۔

پولیس اور متعلقہ حکام نے موقع پر پہنچ کر کسانوں کو سمجھانے اور ٹریفک بحال کرنے کی کوشش کی۔