جیٹھ کے ساتھ محبت، شادی کے 4دن بعد بیوی نے شوہر کا قتل کروادیا

احمد آباد: گجرات کے گاندھی نگر میں ایک دل دہلا دینے والا واقعہ پیش آیا جہاں ایک خاتون نے اپنے جیٹھ کے ساتھ عشق میں مبتلا ہو کر اپنے شوہر کو قتل کروا دیا۔ خاتون کی شادی صرف چار دن قبل ہوئی تھی، لیکن اس نے اپنے عاشق کے ساتھ مل کر اپنے شوہر کو راستے سے ہٹا دیا۔ پولیس نے واقعہ کی تحقیقات کے بعد ملزمین کو گرفتار کر لیا ہے۔

احمد آباد کے رہنے والے بھاوک کی شادی حال ہی میں گاندھی نگر کی پائل سے ہوئی تھی۔ ہفتے کے روز بھاوک اپنی نئی نویلی دلہن کو سسرال سے واپس لانے کیلئے موٹر سائیکل پر روانہ ہوا۔ لیکن جب بھاوک نہ تو گھر پہنچا اور نہ ہی فون اٹھایا، تو پائل کے والد نے بھاوک کے والد کو اطلاع دی۔

 دونوں خاندانوں نے تلاش شروع کی اور ایک مقام پر بھاوک کی موٹر سائیکل سڑک کنارے ملی۔ ایک عینی شاہد نے بتایا کہ چند افراد نے بھاوک کی موٹر سائیکل کو ٹکر مار کر اغوا کر لیا تھا۔

بھاوک کی اغوا کی خبر کے بعد پولیس نے پائل سے پوچھ گچھ شروع کی۔ پولیس کو پائل پر اس وقت شک ہوا جب اس کے موبائل فون کا کال ڈیٹا چیک کیا گیا۔ سخت تفتیش کے دوران پائل نے اعتراف کیا کہ اس کا اپنے جیٹھ کلپیش کے ساتھ محبت کا تعلق تھا۔ اس نے بتایا کہ اس کے والدین نے زبردستی بھاوک کے ساتھ اس کی شادی کروا دی، جس پر اس نے کلپیش کے ساتھ مل کر اپنے شوہر کو قتل کرنے کی سازش رچی۔

پائل کی نشاندہی پر پولیس نے کلپیش کو گرفتار کر لیا، جس نے اعتراف کیا کہ اس نے دو دیگر ساتھیوں کے ساتھ مل کر بھاوک کو اغوا کیا۔ انہوں نے کار میں بھاوک کا گلا دبا کر اسے قتل کیا اور لاش کو قریبی نہر میں پھینک دیا۔ پولیس نے نہر سے بھاوک کی لاش برآمد کر لی اور کلپیش کے ساتھ دو دیگر ملزمان کو بھی حراست میں لے لیا۔

پولیس نے پائل کو بھی گرفتار کر لیا اور مختلف دفعات کے تحت مقدمہ درج کر کے مزید تحقیقات جاری ہیں۔ یہ واقعہ ایک اندوہناک مثال ہے کہ کیسے محبت کے نام پر جرم کیے جا سکتے ہیں۔