دہلی میٹرو کی لفٹ میں پیشاب؟ بزرگ شخص کی حرکت پر خاتون بھڑک اٹھی، ویڈیو وائرل

نئی دہلی: دہلی کے کالکاجی مندر میٹرو اسٹیشن پر ایک بزرگ شخص کی مبینہ حرکت نے سوشل میڈیا پر ہنگامہ کھڑا کردیا۔ وائرل ویڈیو میں ایک خاتون کو لفٹ کے اندر بزرگ شخص سے بحث کرتے دیکھا جاسکتا ہے، جہاں خاتون نے الزام لگایا کہ اس نے لفٹ میں پیشاب کیا۔

یہ ویڈیو بزنس مین ویمن دیپ شیکا مہتا نے انسٹاگرام پر شیئر کی جس میں وہ بزرگ شخص سے سوال کرتی نظر آتی ہیں۔ ویڈیو کے مطابق، لفٹ میں خاتون، بزرگ شخص اور دو دیگر مسافر موجود تھے، جب خاتون نے مبینہ طور پر پیشاب کرنے کا نوٹس لیا۔

ویڈیو میں خاتون کے اعتراض پر بزرگ شخص نے جواب دیا، “ہاں تو سوری، جو کرنا ہے کرلو”، جس کے بعد معاملہ سوشل میڈیا پر تیزی سے وائرل ہوگیا۔ صارفین نے عوامی مقامات پر صفائی، تہذیب اور بزرگ افراد کے ساتھ ہمدردی جیسے موضوعات پر مختلف آراء کا اظہار کیا۔

بعد ازاں دہلی پولیس نے وضاحت جاری کرتے ہوئے بتایا کہ واقعہ 15 مئی 2026 کی رات تقریباً 9:40 بجے پیش آیا۔ پولیس کے مطابق بزرگ شخص جامعہ میٹرو اسٹیشن سے فرید آباد جا رہا تھا اور کالکاجی اسٹیشن پر اچانک طبی ایمرجنسی کا شکار ہوگیا۔

پولیس نے بتایا کہ اس نے بیت الخلا تلاش کرنے کی کوشش کی، لیکن وقت پر ٹائلٹ نہ ملنے کے باعث اس نے مبینہ طور پر بوتل میں پیشاب کیا۔ واقعے کے بعد میٹرو اسٹاف اور سیکیورٹی اہلکاروں کو اطلاع دی گئی۔

حکام کے مطابق بزرگ شخص پر دہلی میٹرو ریل کارپوریشن (DMRC) ایکٹ کی دفعہ 59 کے تحت عوامی خلل؍ گندگی پھیلانے پر جرمانہ عائد کیا گیا۔

سوشل میڈیا پر اس واقعہ پر ملا جلا ردعمل سامنے آیا۔ کچھ صارفین نے خاتون کے ردعمل کی حمایت کی، جبکہ کئی افراد نے بزرگ شخص کی طبی حالت کو دیکھتے ہوئے ہمدردی کا اظہار بھی کیا۔