پاکستانی مقبوضہ کشمیر کو جموں وکشمیر سے جوڑنے کے لئے کام ہو رہا ہے:اشوک کول

سری نگر (یو این آئی) بی جے پی کے جموں وکشمیر یونٹ کے جنرل سکریٹری اشوک کول کا کہنا ہے کہ پاکستان زیر قبضہ کشمیر کو جموں وکشمیر کے ساتھ جوڑنے کے لئے کام ہو رہا ہے۔

انہوں نے کہا کہ یہ ہمارا مطالبہ بھی ہے اور اس سلسلے میں پارلیمنٹ میں ایک قرار داد بھی منظور کی گئی ہے۔ جنرل سکریٹری نے ان باتوں کا اظہار ہفتے کو یہاں جواہر نگر میں واقع پارٹی دفتر پر یوم الحاق کی مناسبت سے منعقدہ ایک تقریب کے حاشیئے پر نامہ نگاروں کے ساتھ بات کرنے کے دوران کیا۔

انہوں نے کہا:‘آج کا دن ہمارے لئے خوشی کا دن ہے اسی دن مہاراجہ ہری سنگھ نے ملک کے ساتھ الحاق کیا تھا’۔ان کا کہنا تھا:‘ہم مانتے ہیں کہ اب پاکستان زیر قبضہ کشمیر کوچھڑوانا ہے اور اس کو جموں وکشمیر کے ساتھ جوڑنا ہے اور 1947 کا جموں وکشمیر بنانا ہے ’۔

انہوں نے کہا کہ یہ ہمارا مطالبہ بھی ہے اور اس سلسلہ میں پارلیمنٹ میں ایک قرار داد بھی منظور کی گئی ہے۔ کول نے کہا کہ بی جے پی کے تمام کارکنوں نے آج یہاں دفتر میں خوشی منائی آج ہی کے دن جموں وکشمیر کا بھارت کے ساتھ الحاق ہوا تھا۔

انہوں نے کہا:‘جو کچھ بچا تھا اس کو ہم نے 5 اگست 2019 کو پورا کیا۔ جنرل سکریٹری نے یوم الحاق پر تعطیل دینے کے لئے سرکار کا شکریہ ادا کیا۔انہوں نے کہا:‘یوم الحاق پر سرکاری تعطیل رکھی گئی ہے جس کے لئے میں سرکار کا مشکور ہوں۔