حیدرآباد کے نہرو زولوجیکل پارک میں ورلڈ ہپو ڈے منایاگیا۔52 سالہ پروتی مرکز توجہ

حیدرآباد: حیدرآباد کے مشہور نہرو زوالوجیکل پارک میں ورلڈ ہپو ڈے (عالمی یومِ دریائی گھوڑا) جوش و خروش کے ساتھ منایا گیا۔ اس موقع پر چڑیا گھر انتظامیہ نے دریائی گھوڑوں کی اہمیت اور ان کے تحفظ کے بارے میں عوام میں شعور بیدار کرنے کے لئے ایک خصوصی تقریب کا اہتمام کیا۔

ہپو انکلوژر پر جشن کا سماں تھا جہاں زو حکام نے وہاں موجود چار دریائی گھوڑوں پروتی، راجیتا، گجنی اور رام کے لئے پھلوں اور سبزیوں سے تیار کردہ خصوصی کیک پیش کیے۔ ان دیوہیکل جانوروں کو رغبت کے ساتھ کیک کھاتے دیکھ کر وہاں موجود افرادبالخصوص بچے بہت محظوظ ہوئے۔

تقریب کے دوران ڈپٹی کیوریٹر جے مرلی دھر نے بتایا کہ دریائی گھوڑے افریقہ کے نیم آبی نباتات خور جانور ہیں جو روزانہ تقریباً 100 کلو گرام تک غذا کھاتے ہیں۔ انہوں نے خصوصی طور پر 52سالہ پروتی کا ذکر کیا اور بتایا کہ وہ ہندوستان کے چڑیا گھروں میں موجود معمر ترین دریائی گھوڑوں میں سے ایک ہے۔

اپنی عمر کے باوجود پروتی مکمل طور پر صحت مند ہے اور چڑیا گھر کی رونق بنی ہوئی ہے۔ حکام کا کہنا ہے کہ اس طرح کی تقاریب سے عوام میں جنگلی حیات کے تئیں محبت اور تحفظ کا جذبہ پیدا ہوتا ہے۔