مشرقی دہلی میں اسٹنٹ ویڈیو بناتے ہوئے نوجوان کی موت

نئی دہلی: مشرقی دہلی کے نیو اشوک نگر میں پستول کے ساتھ اسٹنٹ ویڈیو ریکارڈ کرتے ہوئے ایک نوجوان کی گولی لگنے سے موت ہوگئی ہے۔

ایک سینئر پولیس افسر نے بتایا کہ ویڈیو بناتے وقت نوجوان پون کمار نے پستول میں میگزین ڈالی اور اس کے بعد اسے اپنے سینے پر رکھ کر ٹرگر دبا دیا۔ گولی براہ راست اس کے دل میں لگی اور اس کی موقع پر ہی موت ہوگئی۔

یہ واقعہ 16 مارچ کا ہے اور نیو اشوک نگر پولیس اسٹیشن کو دھرم شلا اسپتال سے ایک ایسے نوجوان کے بارے میں اطلاع ملی تھی جسے گولی لگی تھی۔

انہوں نے بتایا کہ پولیس کی ایک ٹیم فوری طور پر اسپتال بھیجی گئی، جہاں متاثرہ شخص پون کمار کو مردہ قرار دے دیا گیا۔ تحقیقات کے دوران معلوم ہوا کہ یہ واقعہ دلو پورہ گاؤں میں پیش آیا تھا۔ کرائم اور فورنسک ٹیموں نے جائے وقوعہ اور اسپتال، دونوں جگہوں کی جانچ کی اور اہم شواہد جمع کیے۔

ابتدائی تحقیقات سے پتہ چلتا ہے کہ پون کمار نے مبینہ طور پر اپنے چچازاد بھائی ہمانشو کے لائسنسی پستول سے خود کو گولی مار لی۔ ہمانشو اس وقت جائے وقوعہ پر موجود تھا اور مبینہ طور پر ویڈیو ریکارڈ کر رہا تھا۔

پولیس نے پستول، 10 کارتوس اور واقعے کی ویڈیو والا ایک موبائل فون ضبط کر لیا ہے۔ فوٹیج میں مبینہ طور پر متوفی کو خود اسلحہ سنبھالتے ہوئے دیکھا جا سکتا ہے۔

پولیس نے بتایا کہ بی این ایس کی دفعہ 105 اور آرمز ایکٹ کی متعلقہ دفعات کے تحت معاملہ درج کر لیا گیا ہے۔ لاش کو پوسٹ مارٹم کے لیے بھیج دیا گیا ہے اور معاملے کی تحقیقات جاری ہیں۔