فرانس فٹبال ٹیم کی ریڑھ کی ہڈی تھے زین الدین زیدان
حریف کھلاڑی کو چکمہ دے کر مخالف ٹیم کے پالے میں اس طرح حملہ آور ہوا کرتے تھے کہ ان کے موو سے گول ہونا لازمی ہوجاتا تھا۔انہیں مہارتوں اور خصوصیتوں نے انہیں فٹ بال کی تاریخ کے عظیم ترین کھلاڑیوں میں سے ایک بنا دیا۔

نئی دہلی: زین الدین یزید زیدان ایک سابق فرانسیسی فٹبالر ہیں۔ انہیں "زیزو” کے نام سے بھی جانا جاتا ہے۔ زیدان ایک ایسے پیشہ ور فرانسیسی فٹ بالر ر ہے ہیں جس کا میدان میں موجود ہونا اس بات کا ثبوت تھا کہ ٹیم کو ایک ایسا دفاعی کھلاڑی ملا ہوا ہے جو ایک چٹان کی مانند ہے۔
زیدان فرانس کے وہ واحد کھلاڑی رہےجو اکیلے ہی گیند کو گول پوسٹ تک لے جانے کا فن بخوبی جانتے تھے۔ زیدان اپنے کھیل میں برق رفتاری اور تابڑ توڑ موو کے لئے مشہور تھے۔
کھیل شروع ہونے کے بعد گیند وہ میدان میں اس طرح اپنے کنٹرول میں کرلیا کرتے تھے کہ دوسرے کھلاڑ ی کو ان کی گرفت سے گیند نکالنا مشکل ہوجاتا تھا۔ ان کے گیند پاس کرنے کا انداز نرالا رہا۔
حریف کھلاڑی کو چکمہ دے کر مخالف ٹیم کے پالے میں اس طرح حملہ آور ہوا کرتے تھے کہ ان کے موو سے گول ہونا لازمی ہوجاتا تھا۔انہیں مہارتوں اور خصوصیتوں نے انہیں فٹ بال کی تاریخ کے عظیم ترین کھلاڑیوں میں سے ایک بنا دیا۔
زین الدین زیدان کی 23 جون 1972 کو سمیل اور ملیکہ کے یہاں پیدائش ہوئی ۔اپنے چاروں بہن بھائیوں میں زیدان سب سے چھوٹے تھے۔ زیدان کا تعلق ایک متوسط گھرانے سے رہا۔ ان کے والد پیشے کے لحاظ سے ایک اسٹور میں ملازم تھے اور ان کی ماں گھریلو خادمہ تھیں۔
فٹ بال کے لیے زیدان کی دلچسپی پانچ سال کی عمر میں اس وقت پیدا ہوئی، جب انہوں نے اپنے گھر کے قریب کچھ لوگوں کو فٹبال کھیلتے دیکھا۔ انہوں نے انہی لوگوں کے ساتھ فٹ بال کھیلنا شروع کردی۔
پھر کچھ کلبوں کے ساتھ منسلک ہوئے جہاں زیدان نے اپنے بہترین کھیل کا مظاہرہ کیا۔کلبوں میں کھیلتے کھیلتے ان کی صلاحیت میں بہتری آتی گئی اور ان کا کھیل پروان چڑھتا گیا۔
مسلسل بہترین کارکردگی کے بعد انہوں نے فرانس کی جونیئر ٹیم میں شمولیت اختیار کرلی جہاں انہوں نے ایک حملہ آور مڈفیلڈر کے طور پر کھیلنا شروع کیا اور آخر کار ایک طویل عرصے تک قومی ٹیم میں کا حصہ رہے۔ وہ کانز، بورڈو، جووینٹس اور ریئل میڈرڈ جیسے کلبوں کے لیے بھی کھیلے اور ان میں سے ہر ایک کے لیے اعزازات حاصل کئے۔