مقبوضہ فلسطینی علاقوں کی صورتحال پر انٹونیو گٹریس کو تشویش

اقوام متحدہ: اقوام متحدہ کے سکریٹری جنرل انٹونیو گوٹیرس کے ترجمان نے کہا کہ مسٹر گوٹیرس مقبوضہ فلسطینی علاقوں میں جاری تشدد اور جانی نقصان سے سخت پریشان ہیں۔

اقوام متحدہ کے سربراہ کے نائب ترجمان فرحان حق نے چہارشنبہ کو ایک بیان میں کہا کہ سیکرٹری جنرل دہشت گردی کی کارروائیوں سمیت شہریوں کے خلاف تشدد کی شدید مذمت کرتے ہیں اور یہ کہ کشیدگی میں کمی اور تصادم کو روکنے کی فوری ضرورت ہے۔

بیان کے مطابق، اسرائیل کو بین الاقوامی انسانی قانون کے تحت اپنی ذمہ داریوں کی تعمیل کرنی چاہیے، جس میں طاقت کا متناسب استعمال اور شہریوں کو فوجی کارروائیوں سے دور رکھنے کے لیے ہر طرح کی احتیاطی تدابیر اختیار کرنا شامل ہے۔

بیان میں کہا گیا ہے کہ ’’صرف ایک بامعنی سیاسی عمل کی طرف واپسی اور قبضے کے خاتمے سے ہی تشدد اور انسانی جانوں کے ضیاع کے اس تباہ کن سلسلے کا خاتمہ ہوگا۔‘‘