رونالڈو، النصر کلب چھوڑ دیں گے : اسپینش اخبار کا دعویٰ

میڈریڈ: پرتگال کے اسٹار فٹبالر کرسٹیانو رونالڈو نے سعودی کلب النصر کو چھوڑکر واپس میڈریڈ آنے کا فیصلہ کرلیا۔ اسپینش اخبار کی رپورٹ میں دعویٰ کیا گیا ہے کہ کرسٹیانو رونالڈو نے مقامی ثقافت سمیت زبان کی رکاوٹ کے باعث سعودی عرب چھوڑنے کا فیصلہ کیاہے۔

فٹبالر واپس ریال میڈریڈ جانے کیلئے تیار ہیں جبکہ کلب کے صدر فلورنٹینو پیریز نے انہیں یقین دلایا کہ مکمل سپورٹ فراہم کی جائے گی۔ اس سے قبل بھی رونالڈو سال 2009 سے 2018 تک میڈریڈ کی نمائندگی کرچکے ہیں۔

دوسری جانب ان کے حریف ارجنٹائن کو حالیہ ورلڈکپ جتوانے والے کپتان لیونل میسی بھی سعودی کلب النصر کے مخالف الہلال کلب کو جوائن کرنے سے گریزاں ہیں۔ رونالڈو مانچسٹر یونائٹیڈ سے تعلقات خراب ہونے کے باعث سعودی فٹبال کلب النصر سے معاہدہ کیا تھا، کلب سے انکا معاہدہ ڈیڑھ سال پر محیط ہے جبکہ النصر انہیں سالانہ 200 ملین یورو رقم ادا کررہا ہے۔

واضح رہے کہ رونالڈو 2022 میں فوربز کی رپورٹ کے مطابق دنیا کے سب سے زیادہ معاوضہ لینے والے اتھلیٹس کی فہرست میں بھی 115 ملین ڈالر کی کمائی کے ساتھ تیسرے نمبر پر رہے تھے۔ باسکٹ بال لیجنڈ لیبرون جیمز نے 121.2 ملین ڈالر کے ساتھ پہلے جبکہ لیونل میسی 130 ملین ڈالر کے ساتھ ٹاپ پوزیشن پر قابض تھے۔

قبل ازیں یہ خبر بھی سامنے آئی تھی کہ رونالڈو اور ان کی گرل فرینڈ جارجینا روڈریگز کے درمیان تعلقات اچھے نہیں ہیں، فٹبالر اپنی گرل فرینڈ سے ناراض ہیں۔

رپورٹس میں کہا گیاہے کہ رونالڈو کو محسوس ہوتا ہے کہ وہ والدین کے طورپر دیرینہ شراکت داری میں رہنے کے باوجود تیزی سے خودغرض ہورہی ہیں اور ان کے رشتے میں اس کے جذبات کا لحاظ نہیں کررہی ہیں۔