انگلش کرکٹرس کو انٹرنیشنل کرکٹ چھوڑنے بھاری رقم کی پیشکش

ممبئی: انڈین پریمیر لیگ (آئی پی ایل) فرنچائزز نے 5 انگلش کرکٹرز کو انٹرنیشنل کرکٹ چھوڑنے کیلئے 5 ملین پاؤنڈز تک کے معاہدوں کی پیشکش کی ہے۔

آئی پی ایل فرنچائزز نے ’انٹرنیشنل کرکٹ چھوڑو، لیگز سے مال بناؤ‘ آپریشن شروع کیاہے۔ رپورٹس کے مطابق فرنچائز مالکان کی جانب سے کھلاڑیوں کو پیشکش کی گئی ہے کہ سال بھر سال بھر لیگز کیلئے دستیابی ممکن بنانے کیلئے انٹرنیشنل کرکٹ سے کنارہ کشی اختیار کرلیں تو اس کے بدلے انہیں بھاری معاوضہ ادا کیا جائے گا۔

کھلاڑیوں کی عالمی تنظیم فیکا کے ایگزیکٹیو چیرمین ہیتھ ملز نے کہا کہ آئی پی ایل فرنچائزرز نے یہ پیشکش نہ صرف انگلینڈ بلکہ آسٹریلیا، نیوزی لینڈ، جنوبی افریقہ اور ویسٹ انڈیز کے کھلاڑیوں کو بھی کی ہے۔

آئی پی ایل فرنچائزرز کی مختلف ٹی20 لیگز میں ٹیمیں موجود ہیں اس لیے وہ چاہتے ہیں کہ وہ سال بھر فرنچائز کو دستیاب ہوں۔ انہوں نے بتایاکہ کسی کرکٹر کی فرنچائز سے معاہدہ کے بارے میں علم نہیں لیکن کئی کھلاڑیوں نے اس بات سے آگاہ کیاہے۔

ہیتھ ملز نے مزید کہاکہ فرنچائز اور ٹی20 لیگز کے دوران بورڈز کو بین الاقوامی کرکٹ نہ کھیلنے پر راضی کرنا ہوگا۔ یہ ایک سمجھوتہ کرنے کی ضرورت ہوگی‘ میرے خیال میں یہ ممکن ہے۔ قبل ازیں انگلش کرکٹ بورڈ کے منیجنگ ڈائرکٹر راب کی نے کہا تھاکہ نامور کرکٹرز کو خطیر رقم انعام میں دینا آسان نہیں ہوگا۔

دوسری جانب آئی پی ایل کی 10 فرنچائز دیگر لیگز میں اپنی ٹیمیں میدان میں اتار چکی ہیں ان میں کیریبین، جنوبی افریقی لیگ، یواے ای، گلوبل ٹی ٹوئنٹی اور امریکہ میں میجر لیگ جیسے ایونٹس شامل ہیں۔

واضح رہے کہ سعودی عرب میں بھی دنیا کی سب سے بڑی لیگ کا منصوبہ بھی زیر غور ہے۔ ان سب کیلئے ٹاپ کرکٹرز کی دستیابی یقینی بنانے کے مقصد سے سالانہ کنٹراکٹ پیش کیے جائیں گے۔