گری راج سنگھ، دلت کی پلیٹ سے کھاکر دکھائیں: سروجیت

پٹنہ: بہار کے وزیر زراعت کمار سروجیت نے پیر کے دن مرکزی وزیر گری راج سنگھ کو للکارا کہ وہ کسی دلت کی پلیٹ سے کھانا کھاکر دکھائیں۔

آر جے ڈی قائد نے گیا میں آج جلسہ سے خطاب میں کہا کہ گری راج سنگھ سناتن دھرم اور ہندوتوا کے بڑے فالوور ہونے کا دعویٰ کرتے ہیں‘ میں انہیں للکارتا ہوں کہ وہ میرے ساتھ ایک دلت کی پلیٹ سے کھانا کھائیں اور ان کے کپڑے دھویں۔

میں ایسا کرنے کے لئے تیار ہوں‘ کیا وہ ایسا کریں گے؟۔

کمار سروجیت کا بیان ایسے وقت آیا ہے جب وزیراعظم نریندر مودی کی بی جے پی نے نئی پارلیمنٹ کی افتتاحی تقریب میں صدرجمہوریہ دروپدی مرمو کو مدعو نہیں کیا۔ اپوزیشن نے اس پر سخت تنقید کی۔

اپوزیشن کا الزام ہے کہ قبائلی ہونے کی وجہ سے صدرجمہوریہ کو مدعو نہیں کیا گیا۔

سروجیت نے کہا کہ ماتھے پر تلک لگانے اور سوتی دھاگہ باندھنے سے گری راج سنگھ کٹر ہندو نہیں ہوجاتے۔ آر جے ڈی ہندو مسلم سکھ دلت‘ مہادلت‘ عیسائیوں اور دیگر مذاہب کے ماننے والوں کا مساوی احترام کرتی ہے۔