انڈیا اتحاد کا اکتوبر کے اوائل بھوپال میں پہلا مشترکہ جلسہ عام

نئی دہلی: اپوزیشن انڈیا بلاک کی رابطہ کمیٹی کا پہلا اجلاس نئی دہلی میں چہارشنبہ کے دن این سی پی سربراہ شردپوار کے بنگلہ میں منعقد ہوا۔ 14 رکنی کمیٹی کے 11 قائدین نے میٹنگ میں شرکت کی۔

یہ اجلاس سناتن دھرم کے تعلق سے ڈی ایم کے قائد اُدئے ندھی اسٹالن کے ریمارکس پر تنازعہ کے سایہ میں منعقد ہوا۔

میٹنگ میں موجود قائدین میں شردپوار‘ کے سی وینوگوپال(کانگریس)‘ ڈی راجہ (سی پی آئی)‘ جاوید علی خان (ایس پی)‘ ٹی آر بالو (ڈی ایم کے)‘ تیجسوی یادو(آر جے ڈی)‘ راگھو چڈھا (اے اے پی)‘ سنجے جھا (جے ڈی یو)‘ عمر عبداللہ(این سی)‘ محبوبہ مفتی(پی ڈی پی) اور سنجے راوت (شیوسینا یو بی ٹی) شامل ہیں۔

3 ارکان بشمول ابھیشیک بنرجی(ٹی ایم سی) مختلف وجوہات کی بنا پر شرکت نہ کرسکے۔ رابطہ کمیٹی نے فیصلہ کیا کہ نشستوں کی تقسیم کا عمل شروع کیا جائے۔

طئے پایا کہ اتحاد میں شامل جماعتیں‘ ملک کے مختلف حصوں میں مشترکہ جلسہ عام منعقد کریں گی۔ اتحاد کا پہلا جلسہ ئ عام اکتوبر کے پہلے ہفتہ میں بھوپال میں ہوگا۔