تلنگانہ میں کانگریس حکومت بنائے گی۔نائب وزیراعلی کرناٹک شیوکمارکو یقین

حیدرآباد: کرناٹک کے نائب وزیراعلی ڈی کے شیوکمار نے اس یقین کااظہار کیا ہے کہ تلنگانہ میں کانگریس حکومت بنائے گی۔

انہوں نے سوریا پیٹ ضلع کے کوڈاراسمبلی حلقہ میں انتخابی مہم چلائی جہاں سے سابق صدرتلنگانہ کانگریس و رکن پارلیمنٹ اتم کمارریڈی کی اہلیہ این پدماوتی ریڈی مقابلہ کررہی ہیں۔

شیوکمار نے کل شب روڈ شوسے خطاب کرتے ہوئے کہا کہ ملک کی ترقی اور اتحاد کے لئے پارٹی لیڈرراہل گاندھی نے جدوجہد کی اور بھارت جوڑو یاترا نکالی۔

انہوں نے رائے دہندوں سے خواہش کی کہ وہ پدماوتی کو 25ہزارسے زائد ووٹوں کی اکثریت سے کامیاب کریں۔

انہوں نے کہاکہ ناگرجناساگرپراجکٹ کی تعمیر کانگریس نے کروائی تھی جس سے کسانوں کو فائدہ پہنچا اور یہ پراجکٹ 60سال گذرنے کے باوجود بہتر حالت میں ہے تاہم تلنگانہ کے وزیراعلی کے چندرشیکھرراو کی جانب سے تعمیر کردہ کالیشورم پراجکٹ کو حالیہ دنوں میں نقصان پہنچا ہے۔