شیرخوار لڑکے کے اغواء میں ملوث 2 گداگر خواتین گرفتار

حیدرآباد: آصف نگر پولیس ویسٹ زون نے آج ایک شیرخوار لڑکے کے اغواء کے سلسلہ میں دو خواتین کو گرفتار کرلیا۔

اغواء مہدی پٹنم پی وی این آر فلائی اوور، مہدی پٹنم سے کیا گیا تھا۔ گرفتار خواتین کی شناخت سریوتی داستماں، متوطن رنگا ریڈی اور 40 سالہ ایم لکشمی ساکن وقار آباد کی حیثیت سے کی گئی ہے جوکہ گداگر بتائی گئی ہیں۔

ڈی سی پی ویسٹ زون ڈی جوئل ڈیویس نے بتایا کہ 6نومبر کی رات کو 14 ماہ کے کمسن لڑکے محمد رحیم کا اغواء کیا گیا تھا۔

لڑکے کی والدہ شبانہ بیگم جوکہ محو خواب تھی اس وقت دو نامعلوم خواتین نے مذکورہ شیرخوار کا اغواء کیا تھا۔

ڈی سی پی نے بتایا کہ اس سے قبل بھی متذکرہ گداگر خواتین اغواء کے واقعات میں ملوث بتائی گئی ہیں۔