طالبان نے کابل ایرپورٹ حملہ کے منصوبہ ساز کو مارگرایا

واشنگٹن: امریکی عہدیداروں کا کہنا ہے کہ اسلامک اسٹیٹ کا منصوبہ ساز جس کے بارے میں سمجھا جاتا ہے کہ اس نے کابل ایرپورٹ میں 2021 کی تباہ کن بمباری کی منصوبہ بندی کی تھی‘ افغانستان کی طالبان حکومت کے ہاتھوں مارا گیا۔

مختلف میڈیا اطلاعات کے بموجب امریکہ نے اس مشتبہ شخص کی شناخت دہشت گرد گروپ کی افغان شاخ آئی ایس (کے) کے قائد کے حیثیت سے کی ہے لیکن اس نے اس کا نام نہیں بتایا۔

امریکہ نے یہ بھی بتانے سے انکار کردیا کہ وہ کیسے مارا گیا۔ امریکہ کو اندیشہ ہے کہ اگر تفصیل بتادی گئی تو خطہ میں انٹلیجنس معلومات اکٹھا کرنے کی امریکہ کی صلاحیت متاثر ہوسکتی ہے۔

یہ شخص 26 اگست 2021 کے ہلاکت خیز حملہ کا منصوبہ ساز تھا جس میں 13 امریکی فوجی اور 170 افغان شہری مارے گئے تھے۔قومی سلامتی کونسل کے جان کربی نے کہا کہ جاریہ سال یہ اسلامک اسٹیٹ کا بڑا نقصان ہے۔

امریکہ نے طالبان کے اس آپریشن میں حصہ نہیں لیا اور نہ ہی طالبان حکومت نے امریکہ کو اس کے مارے جانے کی اطلاع دی۔ امریکی انٹلیجنس نے اپنے بل بوتے پر اس شخص کی موت کی توثیق کی ہے۔ اگست 2021 میں افغانستان میں امریکہ کی طویل جنگ کا خاتمہ ہوگیا تھا۔ امریکی فوجیں افغانستان سے چلی گئی تھیں۔