راجہ سنگھ کے خلاف بی جے پی قیادت کو رپورٹ پیش

حیدرآباد: بی جے پی کے ایم ایل اے راجہ سنگھ اپنے متنازعہ بیانات کی وجہ سے مرکز توجہ بن گئے ہیں، انہوں نے پارٹی کے سینئر رہنماؤں بشمول تلنگانہ بی جے پی صدر کیشن ریڈی پر نکتہ چینی کی۔

راجہ سنگھ کے بیانات خاص طور پر پارٹی میں گروپ بندی اور قیادت کے تنازعات پر مبنی ہیں، جس کی وجہ سے پارٹی میں بے چینی پھیل گئی ہے اور پارٹی قیادت نے ان کے خلاف بی جے پی کے اعلیٰ قیادت کو ایک رپورٹ پیش کی ہے۔

 راجہ سنگھ نے خاص طور پر اس بات پر تنقید کی کہ پارٹی نے مہیشور ریڈی کو فلور لیڈر کے طور پر مقرر کیا، جب کہ وہ خود اس عہدہ کے لیے امیدوار تھے۔ ان کے بیانات نے پارٹی میں داخلی کشیدگی کو بڑھا دیا ہے۔

اس کے علاوہ، حیدرآباد مقامی بلدیاتی انتخابات کے لیے نامزدگی کے عمل پر راجہ سنگھ نے جو تبصرے کیے ہیں، جن میں گؤتم راو کو امیدوار بنانے پر اعتراضات شامل ہیں، وہ مزید تنازعہ کا باعث بنے ہیں۔ بی جے پی رہنماؤں کو خدشہ ہے کہ ان بیانات سے پارٹی کی ساکھ کو نقصان پہنچ سکتا ہے۔