نئی دہلی: سپریم کورٹ نے پیر کے دن کانگریس قائد پون کھیڑا کی عبوری ضمانت 3 مارچ تک بڑھادی۔ آسام پولیس نے وزیراعظم نریندر مودی کے خلاف مبینہ قابل اعتراض ریمارکس کیس میں انہیں گزشتہ ہفتہ گرفتار کیا تھا۔
چیف جسٹس ڈی وائی چندرچوڑ نے سالیسیٹر جنرل تشار مہتا کی اس بات کا نوٹ لیا کہ آسام پولیس اپنا جواب داخل کرنا چاہتی ہے۔ تشار مہتا حکومت آسام کی طرف سے پیش ہوئے۔
اترپردیش کی نمائندگی کرتے ہوئے ایڈیشنل ایڈوکیٹ جنرل گریما پرساد نے بھی کہا کہ وہ بھی اس معاملہ میں جواب داخل کرنا چاہتی ہیں۔
بنچ نے اس پر 3 مارچ کی تاریخ مقرر کی۔ اس طرح پون کھیڑا کو 3 مارچ تک ضمانت میں توسیع مل گئی۔ پون کھیڑا کو رائے پور جانے والی انڈیگو پروازسے اتارکر دہلی ایرپورٹ پر 23 فروری کو گرفتار کیا گیا تھا۔
انہیں بعدازاں ضمانت مل گئی تھی۔ ان پر الزام ہے کہ انہوں نے 17 فروری کو ممبئی میں ایک پریس کانفرنس میں مودی کے خلاف کچھ کہا تھا۔
