ہم ہندوستان میں تاریخ رقم کرنے آئے ہیں: شاہین آفریدی

چینائی: پاکستان ٹیم کے فاسٹ بولر شاہین آفریدی نے کہا ہے کہ دو میاچس میں شکست سے ٹورنامنٹ ختم نہیں ہوا ابھی 5 میچ باقی ہیں اور ہم یہاں تاریخ رقم کرنے آئے ہیں۔

آئی سی سی کرکٹ ورلڈکپ 2023 میں پاکستان نے اپنا پانچواں میچ آج پیر کو چینائی میں افغانستان کیخلاف کھیلا۔ پاکستان کا آئندہ مقابلہ بھی اسی گراونڈ پر 27 اکتوبر کو جنوبی افریقہ خلاف ہوگا۔ ورلڈکپ میں اپنے چار میاچس کھیلنے کے بعد پاکستان پوائنٹس ٹیبل پر پانچویں نمبر پر ہے۔

پاکستان کو دو میاچس میں کامیابی اور دو میں شکست ہوئی ہے۔ پاکستان نے نیدرلینڈز کے خلاف جیت سے ٹورنامنٹ کا آغاز کیا تھا جبکہ دوسرے میچ میں سری لنکا کے خلاف کامیابی ملی تھی۔ پاکستانی ٹیم تیسرے میچ میں روایتی حریف ہندوستان شکست کھاگئی جس کے بعد اسے آسٹریلیا کے خلاف بھی شکست کا منہ دیکھنا پڑا تھا۔

فاسٹ بولر شاہین آفریدی نے افغانستان کے خلاف میچ سے قبل پی سی بی ڈیجیٹل سے بات کرتے ہوئے کہاکہ ہمیں پاکستانیوں کی ٹیم سے وابستہ توقعات کا علم ہے اور انہیں پورا کرنے کیلئے ہم بے چین ہیں۔ دو میاچس میں شکست سے ٹورنامنٹ ختم نہیں ہوا، ابھی پانچ میچ باقی ہیں اور ہم ہندوستان میں تاریخ رقم کرنے آئے ہیں۔

انہوں نے کہاکہ کیچ ڈراپ ہونا کھیل کا حصہ ہے۔ اسامہ میر کا پہلا میچ تھا لیکن اس میں کوئی شک نہیں کہ ایسے موقع پر کیاچس بہت اہم ہوتے ہیں۔ ایک ڈراپ کیچ کی وجہ سے آپ کسی پر الزام نہیں لگاسکتے۔ یہ ایک ٹیم گیم ہے اور ہم بطور ٹیم جیتتے یا ہارتے ہیں۔

میرے خیال میں جو چیز اہم ہے وہ یہ ہے کہ آپ فیلڈنگ کرتے وقت کتنی جان لگاتے ہیں اور آپ اس سے کتنا لطف اندوز ہوتے ہیں۔ شاہین آفریدی نے مزید کہاکہ ہندوستان کی وکٹیں بولرز کیلئے مددگار نہیں ہیں۔

ہندوستان میں بولنگ کے دوران اتنا سوئنگ نہیں ملتا جتنا انگلینڈ، آسٹریلیا یا نیوزی لینڈ میں ملتا ہے۔ یہاں کی وکٹوں میں زیادہ باونس نہیں ہے جس کی وجہ سے ہمیں یہاں ہائی اسکورنگ گیمز دیکھنے کو ملتے ہیں۔ ایسے میں چند اچھے کیاچس یا رن آؤٹ آپ کی ٹیم کو فائدہ دے سکتے ہیں۔