کینیڈا کے 40 سفارت کاروں کو ہندوستان چھوڑدینے کا حکم

نئی دہلی: سمجھا جاتا ہے کہ ہندوستان نے کینیڈا سے کہہ دیا ہے کہ وہ 10  اکتوبر تک اپنے تقریباً 40 سفارت کار واپس بلالے۔ خبروں میں کہا گیا ہے کہ نئی دہلی نے اوٹاوا سے کہہ دیا ہے کہ 10  اکتوبر تک سفارت کار واپس نہیں بلائے گئے تو وہ سفارتی استثنیٰ/ ڈپلومیٹک امیونٹی سے محروم ہوجائیں گے۔

 دونوں ممالک کے درمیان تعلقات کشیدہ ہوتے جارہے ہیں۔ ہندوستان میں کینیڈا کے 60 سے زائد سفارت کار تعینات ہیں۔ گزشتہ ماہ وزیراعظم کینیڈا جسٹن ٹروڈو نے پارلیمنٹ میں الزام عائد کیا تھا کہ سکھ خالصتان نواز ہردیپ سنگھ نجار کے قتل میں ہندوستانی انٹلیجنس ایجنسیاں ملوث ہوسکتی ہیں۔ ان کے اس الزام کے بعد دونوں ممالک نے ایک دوسرے کے سفارت کاروں کو ملک چھوڑکر چلے جانے کا حکم دے دیا تھا۔