بنڈلہ گوڑہ جاگیر میں اکسپائرڈ انجکشن دینے سے 6 ماہ کے معصوم بچہ کی موت

حیدرآباد: حیدرآباد کے بنڈلہ گوڑہ جاگیر، سن سٹی علاقے میں ایک افسوسناک واقعہ پیش آیا، جہاں مبینہ طور پر اکسپائرڈ انجکشن دیے جانے کے باعث 6 ماہ کے ایک معصوم شیر خوار بچے کی موت ہوگئی۔ بچے کی شناخت رَامو کے طور پر کی گئی ہے۔

تفصیلات کے مطابق رَامو کو تیز بخار ہونے پر اس کے والدین علاج کے لیے قریبی کریانس ہاسپٹل لے گئے تھے۔ اہلِ خانہ کا الزام ہے کہ اسپتال میں موجود ڈاکٹروں نے بچے کو میعاد ختم شدہ دوائیں دیں۔ دوائیں دیے جانے کے کچھ ہی دیر بعد بچے کی طبیعت اچانک بگڑ گئی اور وہ دم توڑ گیا۔

متاثرہ خاندان نے الزام لگایا کہ یہ واقعہ اسپتال کے ڈاکٹروں کی سنگین لاپرواہی کا نتیجہ ہے۔ افراد خاندان نے مطالبہ کیا ہے کہ متعلقہ حکام اس معاملے کی فوری اور منصفانہ جانچ کریں اور قصوروار افراد کے خلاف سخت کارروائی کی جائے۔

واقعے کے بعد مقامی لوگوں میں غم و غصہ پایا جا رہا ہے۔ مقامی افراد نے اسپتال انتظامیہ اور ڈاکٹروں کی مبینہ لاپرواہی کے خلاف سخت کارروائی کا مطالبہ کیا۔ اطلاع ملتے ہی پولیس موقع پر پہنچی، کیس درج کر لیا گیا ہے اور واقعے کی مکمل جانچ جاری ہے۔