ٹرین میں مسافرین کو ڈرادھمکا کر اشیا لوٹ لینے والے 9افراد گرفتار

حیدرآباد: تلنگانہ کے ضلع نظام آباد میں شرڈی ایکسپریس ٹرین میں خاتون مسافرین کو ڈرادھمکاکر ان کے پاس سے سونا، نقد رقم اور دیگر اشیا لوٹ لینے والے 9افراد کو گرفتار کرلیاگیا۔ ضلع نظام آباد کے نوی پیٹ کراسنگ پر ٹرین روک دی گئی جس کے بعد اس ٹرین میں 9افراد سوار ہوئے جنہوں نے یہ واردات انجام دی۔

ریلوے پولیس نے 9نوجوانوں کو حراست میں لے لیاجن کا تعلق مہاراشٹرکے بیڑ ضلع سے ہے۔ایس ون بوگی سے ایس 10بوگی تک یہ واردات انجام دی گئی تھی۔

اس ٹرین کے باسر تک پہنچنے کے بعد ٹرین کی زنجیر کھینچ کر یہ نوجوان فرار ہورہے تھے کہ مسافرین نے ان کو پکڑلیا اور ریلوے پولیس کے حوالے کردیا۔ریلوے پولیس نے اس خصوص میں ایک معاملہ درج کرکے جانچ شروع کردی۔