فٹبال کی دنیا کا ایک عظیم باب بند

پرتگال کے عالمی شہرت یافتہ فٹبال اسٹار کرسٹیانو رونالڈو نے بین الاقوامی فٹبال سے ریٹائرمنٹ کا اعلان کردیا ہے۔ 41 سالہ رونالڈو نے سوشل میڈیا پر اپنے جذباتی پیغام کے ذریعے قومی ٹیم کو الوداع کہنے کا فیصلہ کیا۔ انہوں نے کہا کہ اب پرتگال کی قومی ٹیم کی 7 نمبر کی جرسی نئی نسل کے حوالے کرنے کا وقت آگیا ہے۔

رونالڈو کے مطابق یہ جرسی کبھی صرف ان کی نہیں تھی، بلکہ 23 سال تک اسے پہن کر دنیا بھر کے میدانوں میں اپنے ملک کی نمائندگی کرنا ان کے لیے اعزاز اور بڑی ذمہ داری تھی۔

انہوں نے کہا کہ یہ فیصلہ آسان نہیں تھا، کیونکہ زندگی کے بعض فیصلے صرف عقل سے نہیں بلکہ دل سے بھی کیے جاتے ہیں۔

رونالڈو کا بین الاقوامی سفر اگست 2003 میں شروع ہوا تھا اور اب وہ اس سفر کو ختم کر رہے ہیں۔ انہوں نے پرتگال کی جانب سے 234 بین الاقوامی مقابلوں میں حصہ لیتے ہوئے 146 گول اسکور کیے۔ بین الاقوامی فٹبال میں سب سے زیادہ گول کرنے کا عالمی ریکارڈ بھی انہی کے نام ہے۔

رونالڈو نے اپنے شاندار کیریئر میں 5 مرتبہ فیفا کے بہترین کھلاڑی کا اعزاز حاصل کیا، جبکہ 3 مرتبہ یوئیفا مینز پلیئر آف دی ایئر اور 4 مرتبہ یورپین گولڈن شو ایوارڈ بھی جیتا۔

ان کی قیادت میں پرتگال نے 2006 کے عالمی کپ میں سیمی فائنل تک رسائی حاصل کی تھی، جو عالمی کپ میں ٹیم کی اب تک کی بہترین کارکردگی ہے۔
تاہم عالمی کپ کا خطاب جیتنے کا ان کا خواب پورا نہ ہوسکا۔ بین الاقوامی فٹبال سے سبکدوشی کے باوجود رونالڈو کلب فٹبال میں کھیل جاری رکھیں گے اور شائقین کو اپنی صلاحیتوں سے محظوظ کرتے رہیں گے۔