اب جیل میں ملے گی یہ خصوصی سہولت

حیدرآباد کی چنچل گوڑہ سنٹرل جیل میں خواجہ سرا اور مختلف صنفی شناخت رکھنے والے قیدیوں کے لیے خصوصی سیل قائم کیا گیا ہے۔ قومی انسانی حقوق کمیشن کی مداخلت کے بعد جیل انتظامیہ نے یہ قدم اٹھایا ہے۔

اس کے علاوہ اس سیل میں رہنے والے قیدیوں کو اپنی صنفی شناخت کے مطابق لباس پہننے کی اجازت بھی دے دی گئی ہے۔ تفصیلات کے مطابق 8 اکتوبر کو قومی انسانی حقوق کمیشن کے خصوصی مانیٹر نے چنچل گوڑہ جیل کا دورہ کیا تھا۔

یہ عہدیدار خواجہ سراؤں اور ایل جی بی ٹی کیو برادری کے حقوق سے متعلق امور کی نگرانی کرتے ہیں۔ دورے کے دوران انہوں نے جیلوں میں خواجہ سرا قیدیوں کے تحفظ، عزت اور بنیادی حقوق کو یقینی بنانے کے لیے جاری رہنما خطوط پر عمل کرنے کی ضرورت پر زور دیا تھا۔

اس سلسلے میں وزارت داخلہ نے بھی ریاستی حکومتوں اور جیل حکام کو ہدایات جاری کر رکھی ہیں کہ قیدیوں کی صنفی شناخت کا احترام کیا جائے اور ان کی رہائش، طبی معائنے، تلاشی اور لباس کے انتظامات میں ان کی شناخت کو ملحوظ رکھا جائے۔

کمیشن کی ہدایت کے بعد چنچل گوڑہ جیل انتظامیہ نے خصوصی سیل قائم کرنے کی سفارش پر عمل درآمد کی اطلاع دی ہے۔ جیل سپرنٹنڈنٹ نے اس سلسلے میں قومی انسانی حقوق کمیشن کو رپورٹ بھی پیش کی ہے، جس کا اعلان کمیشن نے 5 نومبر کو جاری کردہ پریس ریلیز میں کیا۔

کمیشن نے واضح کیا کہ ایسے قیدیوں کے لیے علیحدہ رہائش کا انتظام کرتے وقت انہیں دوسرے قیدیوں سے مکمل طور پر الگ تھلگ نہ کیا جائے اور نہ ہی ان کے ساتھ کسی قسم کا امتیازی سلوک ہو۔ اس اقدام کا مقصد جیلوں میں مختلف صنفی شناخت رکھنے والے افراد کے وقار، تحفظ اور انسانی حقوق کا تحفظ یقینی بنانا ہے۔