بیف کھانے والا شخص پارلیمنٹ میں بھگوان شیوا کی تصویر دکھاتا ہے:سی پی جوشی

جئے پور: راجستھان بی جے پی کے صدر سی پی جوشی نے بظاہر کانگریس لیڈر راہول گاندھی پر تنقید کرتے ہوئے کہا ہے کہ جو لوگ ”بیف کھاتے ہیں“ وہ پارلیمنٹ میں بھگوان شیوا کی تصویر دکھاتے ہیں۔ جوشی نے چہارشنبہ کے روز دوسا میں پارٹی کے ایک اجلاس میں یہ ریمارک کیا۔ ان کی تقریر کا ایک ویڈیو سوشیل میڈیا پر سامنے آیا ہے۔

 جوشی نے کسی کا نام لئے بغیر کہا ہند۔چین لڑائی میں بین الاقوامی سرحد پر کشیدگی پائی جاتی ہے اور راہول گاندھی چینی سفیر کے ساتھ اٹھتے بیٹھتے ہیں۔ جو شخص بیف کھاتا ہے مہادیو کی تصویر پارلیمنٹ میں لاتا ہے۔ اسے برداشت نہیں کیا جائے گا۔

انہوں نے کہا کہ اگر کوئی شخص ہندوؤں کو دہشت گرد قرار دیتا ہے، انہیں تشدد کرنے والے قرار دیتا ہے اور رام مندر کی مخالفت کرتا ہے، تو کیا ہم خاموش رہیں گے؟ جو لوگ صدرجمہوریہ دروپدی مرمو کی جلد کی رنگت کی وجہ سے ان کا مذاق اڑاتے ہیں، وہ کامیاب ہوتے رہیں گے، اگر ہم خاموش تماشائی بنیں رہیں۔

راہول گاندھی نے یکم جولائی کو صدر جمہوریہ کے خطبہ پر تحریک تشکر مباحث میں حصہ لیتے ہوئے بھگوان شیوا، گرونانک اور یسوعمسیح کی تصاویر دکھائیں تھیں، جب انہوں نے ہندوازم، اسلام، سکھ مت، عیسائیت، بدھ ازم اور جین ازم کا حوالہ دیا تھا، تاکہ بے خوفی اور بے باکی کی اہمیت کو اجاگر کرسکیں۔