شراب کی دکان میں بڑے پیمانہ پرآگ لگ گئی

حیدرآباد: حیدرآباد کے علاقہ سوماجی گوڑہ میں ہفتہ کی صبح ایک شراب کی دکان میں اچانک آگ بھڑک اٹھی جس کے نتیجہ میں لاکھوں روپے مالیت کا مال جل کر راکھ ہو گیا۔

اس واقعہ میں کسی جانی نقصان کی اطلاع نہیں ملی ہے۔ فائر بریگیڈ کے حکام کے مطابق آگ راج بھون روڈ پر واقع شراب کی دکان میں لگی اور اطلاع ملتے ہی مختلف فائر اسٹیشنوں سے فائر بریگیڈس فوری طور پر وہاں پر پہنچ گئے۔

کچھ ہی دیر میں آگ پر قابو پا لیا گیا۔ فائر ڈپارٹمنٹ کے حکام کو شبہ ہے کہ آگ شارٹ سرکٹ کی وجہ سے لگی ہے تاہم آتشزدگی کی اصل وجوہات کا تعین کرنے کے لیے تحقیقات جاری ہیں۔

اس واقعہ میں دکان کے اندر موجود سامان اور فرنیچر کو شدید نقصان پہنچا ہے، پولیس کی جانب سے نقصان کا تخمینہ لگایا جا رہا ہے۔

اس واقعہ میں کسی کے جھلسنے یا کسی کی موت کی کوئی اطلاع نہیں ملی ہے۔واضح رہے کہ حالیہ دنوں کے دوران شہرحیدرآباد میں آگ لگنے کے واقعات میں غیرمعمولی اضافہ درج کیاگیا ہے۔