حیدرآبادکے حمایت نگر علاقہ کی ایک سافٹ ویئر کمپنی میں بڑے پیمانہ پر آگ لگ گئی

حیدرآباد: شہرحیدرآبادکے حمایت نگر علاقہ کی ایک سافٹ ویئر کمپنی میں بڑے پیمانہ پر آگ لگ گئی۔یہ آگ شارٹ سرکٹ کے نتیجہ میں لگی جس کے نتیجہ میں تروملا اسٹیٹ کی دوسری منزل پر موجود تمام سامان جل کر خاکستر ہوگیا۔

آگ دیکھ کر خوفزدہ ملازمین جان بچانے کیلئے دوڑپڑے۔ آگ کے ساتھ کثیف دھواں کھڑکیوں سے نکلتے ہی مقامی لوگوں میں خوف و ہراس پھیل گیا۔

آگ کے پھیلنے کے خوف سے متصل عمارتوں میں رہنے والے بھی اپنی جان بچانے کے لئے عمارت سے نکل پڑے۔سرور روم میں شارٹ سرکٹ کے باعث آگ لگی جس کے پھیلتے ہی دفتر میں موجود کمپیوٹرس جل گئے۔

ملازمین کی جانب سے فائر بریگیڈ کو اطلاع دی گئی جس کے بعد فائر بریگیڈ کے عملہ نے وہاں پہنچ کر کافی جدوجہد کے بعد آگ پر قابو پایا۔ عمارت پانچ منزلہ ہونے کے باعث کثیف دھوئیں نے اسے اپنی لپیٹ میں لے لیا۔