بہارمیں بیف لے جانے کے شبہ میں ایک مسلم شخص کا پیٹ پیٹ کر قتل

سارن: بہارکے ضلع سارن میں بیف لے جانے کے شبہ میں ہجوم نے ایک55 سالہ شخص کوپیٹ پیٹ کر ہلاک کردیا۔ مہلوک کی ضلع سیوان کے موضع حسن پور کے نسیم قریشی کی حیثیت سے شناخت کی گئی ہے۔

 ایک مقامی پولیس عہدیدارکے مطابق جب نسیم اوراس کابھتیجہ فیروزقریشی ضلع سارن کے موضع جوگیہ میں رشتہ داروں سے ملاقات کیلئے جارہے تھے۔ سارن کے سپرنٹنڈنٹ آف پولیس گورومنگلا نے بتایاکہ مقامی عوام نے ایک مسجد کے قریب دونوں کوروک لیا۔ بعدازاں بحث و تکرارہوئی۔

فیروزبھاگ نکلنے میں کامیاب ہوگیا جبکہ ہجوم نے نسیم کولاٹھیوں سے مارا۔بعدازاں ہجوم نے خود موضع رسول پور میں نسیم کوپولیس کے حوالہ کردیا۔جس کے بعد اسے فوری سرکاری ہاسپٹل منتقل کردیاگیا۔

تاہم علاج کے دوران اس کا انتقال ہوگیا۔ ایس پی نے فون پر بتایاکہ مارپیٹ کے سلسلہ میں اب تک تین افراد کوگرفتارکیاگیاہے۔پولیس نے اس کیس میں ملوث دیگر ملزمین کی گرفتاری کیلئے تلاشی بھی شروع کردی ہے۔ کیس کی تمام پہلوؤں سے تحقیقات کی جارہی ہیں۔