اے سی بی نے ایڈیشنل کلکٹر کے مکانات کی تلاشی لی۔منقولہ اور غیر منقولہ جائیدادوں کا انکشاف

حیدرآباد: تلنگانہ اینٹی کرپشن بیورو نے ہنمکنڈہ ضلع کے ایڈیشنل کلکٹر (ریونیو) اور انچارج ڈسٹرکٹ ایجوکیشن آفیسر (ڈی ای او) وینکٹ ریڈی کے خلاف آمدنی سے زائد اثاثوں کا مقدمہ درج کیا ہے۔ مذکورہ عہدیداراس وقت معطل ہیں۔

جمعرات کو اے سی بی کی جانب سے جاری کردہ پریس ریلیز کے مطابق، وینکٹ ریڈی کے خلاف یہ کارروائی ان اطلاعات کے بعد کی گئی کہ انہوں نے اپنی ملازمت کے دوران مبینہ طور پر بدعنوانی اور ناجائز ذرائع کا استعمال کرتے ہوئے اپنی معلوم آمدنی سے کہیں زیادہ جائیدادیں بنائی ہیں۔

ان کے خلاف انسدادِ بدعنوانی ایکٹ کی مختلف دفعات کے تحت مقدمہ درج کیا گیا ہے۔

اے سی بی کے حکام نے بدھ اور جمعرات کو وینکٹ ریڈی کی رہائش گاہ اور ان کے رشتہ داروں سے منسلک سات دیگر مقامات پر تلاشی لی۔ تلاشی کے دوران موصول ہونے والی دستاویزات سے کروڑوں روپے مالیت کی منقولہ اور غیر منقولہ جائیدادوں کا انکشاف ہوا ہے۔

برآمد ہونے والے اثاثوں کی تفصیلات درج ذیل ہیں۔

غیر منقولہ جائیدادیں: ایک ولا اور ایک فلیٹ (مالیت 4.65 کروڑ روپے)، ایک کمرشل دکان (60 لاکھ روپے)، آٹھ اوپن پلاٹس (65 لاکھ روپے) اور 14.25 ایکڑ زرعی زمین (50 لاکھ روپے)۔ حکام کا کہنا ہے کہ ان جائیدادوں کی مارکیٹ ویلیو سرکاری قیمت سے کہیں زیادہ ہے۔

منقولہ اثاثے: 30 لاکھ روپے نقد، بینک بیلنس کی صورت میں 44 لاکھ روپے، 11 لاکھ روپے کا گھریلو سامان، 40 لاکھ روپے مالیت کی تین گاڑیاں اور 4.35 لاکھ روپے مالیت کا 297 گرام سونا۔

اے سی بی کے مطابق اب تک کی تحقیقات میں 7,69,38,332 روپے کے اثاثوں کی نشاندہی ہو چکی ہے۔ بیورو نے واضح کیا کہ مزید اثاثوں کا پتہ لگانے کے لئے تحقیقات اور دستاویزات کی جانچ کا عمل ابھی جاری ہے۔