کپاس کے بیجوں کی مصنوعی قلت اور زیادہ قیمت پر فروخت پر کارروائی:وزیرزراعت

حیدرآباد: تلنگانہ کے وزیر زراعت نرنجن ریڈی نے حکام کو ہدایت دی ہے کہ وہ کپاس کے بیجوں کی مصنوعی قلت اور زیادہ قیمت پر فروخت کرنے کی اطلاعات پر کارروائی کرے۔

انہوں نے کہاکہ کاشتکار کپاس کی کاشت کے لیے آئی آئی جی بی ہائبرڈ بیج استعمال کرتے ہیں۔

تمام کمپنیوں کے کپاس کے بیج ایک ہی قسم کے ہوتے ہیں،یہ سب پرائیویٹ کمپنیاں تیار کرتی ہیں۔

مرکزی حکومت کی طرف سے فی پیکٹ مقرر کردہ زیادہ سے زیادہ قیمت 450 گرام کے لیے 853 روپے مقرر کی گئی ہے۔کپاس کے بیج کی قیمت مرکزی حکومت طے کرتی ہے لیکن قیمتوں کا کنٹرول ریاستوں کے ہاتھ میں ہے۔

انہوں نے نشاندہی کرتے ہوئے کہاکہ حکومت کے علم میں آیا ہے کہ بعض کمپنیاں لالچ میں کپاس کے بیج کی مصنوعی قلت پیدا کر کے منڈی میں مہنگے داموں پر تخم فروخت کر رہی ہیں۔

عہدیداروں کو چاہئے کہ وہ ایسے ڈیلرز کے لائسنس منسوخ کرنے کے اقدامات کریں۔کپاس کے بیج ضرورت سے زیادہ مارکٹ میں دستیاب ہیں۔

انہوں نے کہاکہ اس سیزن میں 65 لاکھ ایکڑ میں کپاس کی کاشت متوقع ہے جس کے لئے 58,500 کوئنٹل بیج کی ضرورت ہے۔