اے ایف سی انڈر-17 ایشین کپ: ہندوستان ازبکستان سے ہار کر باہر، ورلڈ کپ کوالیفکیشن کا خواب بھی چکنا چور

جدہ: سعودی عرب میں جاری اے ایف سی انڈر-17 ایشین کپ 2026 میں ہندوستانی ٹیم کا سفر مایوس کن شکست کے ساتھ اختتام پذیر ہوگیا۔ کنگ عبداللہ اسپورٹس سٹی ہال اسٹیڈیم میں کھیلے گئے گروپ ‘ڈی’ کے اپنے آخری میچ میں ہندوستان کو دفاعی چیمپیئن ازبکستان کے ہاتھوں 0-3 سے شکست کا سامنا کرنا پڑا۔

اس ہار کے ساتھ ہی نہ صرف ہندوستان ٹورنامنٹ سے باہر ہو گیا ہے، بلکہ قطر میں منعقد ہونے والے فیفا انڈر-17 ورلڈ کپ 2026 کے لیے تاریخی کوالیفکیشن حاصل کرنے کا خواب بھی چکنا چور ہو گیا ہے۔ ازبکستان کی اس فتح نے اس کے اور آسٹریلیا دونوں کے لیے اگلے مرحلے کی راہ ہموار کر دی ہے۔

آسٹریلیا کے خلاف افتتاحی میچ میں 0-4 کی عبرتناک شکست کے بعد، ہندوستانی ٹیم کے لیے ورلڈ کپ کی امیدیں برقرار رکھنے کے لیے یہ میچ جیتنا لازمی تھا۔ ہندوستان نے کھیل کا آغاز محتاط انداز میں کیا، تاہم ازبکستان نے شروع سے ہی کھیل پر گرفت مضبوط رکھی۔

بھارتی گول کیپر راجروب سرکار نے کئی شاندار بچاؤ کیے، لیکن 32 ویں منٹ میں ایک فاش غلطی بھارت کو مہنگی پڑ گئی۔ سرکار نے پنالٹی ایریا کے اندر ازبک کھلاڑی لازیز عبدالرحیموف کو گرایا، جس پر ریفری نے پنالٹی دے دی۔

عبدالرحیموف نے بغیر کسی غلطی کے گیند کو جال میں پہنچا کر اپنی ٹیم کو 1-0 کی برتری دلا دی۔

وقفے کے بعدہندوستانی ٹیم زیادہ جارحانہ نظر آئی۔ 56 ویں منٹ میں دلال میون گانگٹے کی ایک بہترین فری کک کراس بار سے ٹکرا گئی، لیکن ری باؤنڈ پر ہیراگنبا سیرام گول کرنے میں ناکام رہے۔

کھیل کے 60 ویں منٹ میں ہندوستان کی مشکلات اس وقت مزید بڑھ گئیں جب وانگکھیم ڈینی سنگھ نے ایک کارنر کک کو روکنے کی کوشش میں گیند اپنے ہی جال میں ڈال دی ، جس سے ازبکستان کی برتری 2-0 ہو گئی۔

بالآخر 78 ویں منٹ میں ازبکستان کے اخرو بیک راوشن بیکوف نے تیسرا گول داغ کر ہندوستان کی واپسی کے تمام راستے بند کر دیے۔

ہندوستانی فٹ بال کے لیے یہ ایک "تکلیف دہ ناکامی” ثابت ہوئی، کیونکہ ٹیم پہلی بار میرٹ کی بنیاد پر انڈر-17 ورلڈ کپ کے لیے کوالیفائی کرنے کی کوشش کر رہی تھی۔ اس شکست نے ایک بار پھر ہندوستانی فٹ بال کے نچلی سطح پر بہتری کی ضرورت کو نمایاں کر دیا ہے۔